Ha ka jingleit jurip ïa ka Wah Myntdu, lap ba jur ka jingtheh khyndew na ka jingpyntrei surok

Jowai, K’lyngkot 17: Ka jinghiar jurip (Joint Inspection) ïa ki bynta jong ka Wah Myntdu ka la bthah da u Deputy Commissioner ka West Jaiñtia Hills District, la pynlong ha ka sngi Balang ha ka jingdonlang naduh u Assistant Commissioner, ki ophisar na ka tnad PWD (Rds), Water Resources Division, ki nongïalam ka Jaiñtia Fishing Environment Protection Association, ki nongïalam ka Khooid Ya Ka Wah Myntdu lem bad ki paidbah nongshong shnong ka sor Jowai.
Kane ka jinghiar jurip mynta ka sngi Balang kala sdang na ki bynta ka Jingkieng Myntdu surok Jowai-Shillong bad leit jngoh ïa ka liar ‘kam kam’ kaba la shah ktah na ka jingpyntrei surok, nangta kiba leit hiar sha Treïongriang Jingkieng Myntdu bad leit jurip kumjuh ïaka rukom pyntrei ïa u surok By-Pass na Khliehtyrshi haduh Treiongriang ha kaba la lap shisha ïa ka rukom theh khyndew kaba la jur shaba palat bad kaba lah ruh ban ktah ïaka Wah Myntdu baroh kawei.
Hadien kane ka kynhun kala leit ban jurip khaduh ïa ka dam um jong ka tnad PHE na Urkhla ha kaba la pynsngew ba la donkam ban khlong noh ïa u shyiap uba don ha ki bynta ka Wah Moopiah ha ka jaka jong ka Dam ba tan umbam ïa ka sor Jowai.
Na ka liang ki dkhot jong kine ki kynhuh kiba dei ki paidbah nongshong shnong ka sor Jowai kila pynpaw ka jingsngewdiaw halor ka jinglong jingman ka Wah Myntdu kaba la shah ktah eh katba nangmih ki sngi khamtam na ka daw jong ka jingtheh khyndew sha ki bynta jong ka.
La ong ruh ba kane ka jingpyntrei ïa u surok kim shem la ïaid katkum ki kyndon aiñ jong ka NGT kiba la mana tyngeh ba ym bit ban pynjulor ïa ki bynta ka Wah Myntdu lane bret pathar katba lap sha ki bynta ka Wah Myntdu.
Haba thew ïa ka jingshna ïa u surok kaba dei ban long 25 miter, hynrei na ka katei ka miter ba la dep khlong ïa u surok, la ïohi ba ka jingleit theh pat ïaka khyndew kala poi shajan jong ki bynta ba ïasoh bad ka wah Mynkreh, halor kane la kyntu jur ïa ki ophisar bad u Contractor ba kin weng ne khad noh ïa katei ka khyndew katba ka aiom slap kam pat wan.
Ïa utei u surok Jowai By-Pass uba don kumba 6 kilo miter eiei uba pynïasoh na ka surok bah NH-44 na Khliehtyrshi haduh ka surok NH-40E ha jingkieng Treïongriang ba leit sha Amlarem la pyntrei da ka Dhar Construction Company (DCC) bad ka jingpyntrei ka dang ïaid shaid shaid mynta.
Ïa ka report jong kane ka jingleit Jurip (Joint Inspection) mynta ka sngi yn aiti bad pynpoi sha u khliehduh ka District ban ïoh leh ïa kaba donkam.