Nongpoh, K’Lyngkot 17: Ka party BJP Meghalaya Pradesh mynta ka sngi kala leit ban pynsngewthuh paidbah halor ka skhim PM-Vishwakarma lyngba ka District Level Workshop haka shnong Pahamsyiem bala wan ban shim bynta da nongïalam BJP bad ki paidbah kiba don ka sap thaiñ bad shna jingshna.
Kum ban shu kdew hangne ka PM-Vishwakarma kadei ka skhim kaba la pynlait paidbah da u Prime Minister ka Ri u Narendra Modi na ka bynta ban ïarap ïaki nongthaiñ jaiñ bad ki briew kiba don sap haki kam shna kti bapher bapher ba kin lah ban kyrshan bad ïeng hala ki jong ki kjat.
Ha kane ka sngi la wan ban sakhi lang u Bah Rickman Momin President State Bhartiya Janata Party Meghalaya, u Bah Wankit Poshna General Sectery State Bhartiya Janata Party Meghalaya, ka Dr. Fenela Lyngdoh, kyrtong ka BJP ha ka election MP ha ka jylla, u Bah Sen Thabah President Ri-Bhoi BJP, u Bah Silentstar Ranee Sectery BJP Ri Bhoi lem bad kiwei kiwei ki nongkitkam ba ha khmat ka Party BJP.
Naka liang u Wankit Pohshna haba kren ha katei ka sngi u la pynshai ba katei ka skhim ka dei ka skhim sorkar bala pynlait paidbah da u Myntri Rangbah ka ri naka bynta ban ai ka jingïarap sha kito ki nongthaiñ jaiñ bad ki nongshna jingshna ban kyntiew ïaka ri bad ka ioh ka kot jong ki paidbah kaba di ka thong jong ka Vikasit Bharat Sankalp ban pynlong ïaka ri India kaba roi ba par shuwa u snem 2040.
U la ong ruh ba ki paidbah ki dei ban tip ïaki skhim sorkar ban ioh jingmyntoi kum ka jingkyrshan ïaka sap ka phong kaba ki don bad lyngba kane ka skhim kan ïarap ïaki paidbah ba kin ïeng hala ki jong ki kjat khamtam ban kyrshan da lade ïalade bad ban pynlong ïaka ri India ban lait naka jingduk.
Ha kane ka sngi, Ka Bharatiya Janata Party (BJP) Meghalaya kala pdiang sngewbha ruh ïa ki 4 ngut ki rangbah ki ban wan ïasoh ïalade shaka Party ha Ri-Bhoi.
