Dawa ka HANM ïa ka Sorkar ban shna Mini Secreteriat bad Governor’s House ha Jowai

Khliehriat, Kyllalyngkot, 17: Ka Hynñiewtrep Achil National Movement (HANM) Jaiñtia Zone, ka dawa na ka sorkar jylla ba ka dei ban sdang noh ban shna ïa ka Mini Secreteriat bad ruh ban shna ïa ka Governor House ha Jowai bad ka seng ka pynpaw ruh ka jingsngew khia halor ka jingpyn slem ban shna khamtam ïa ka Mini Secreteriat kaba u Myntri rangbah ka jylla, u Conrad Sangma u la dep kular ha shwa ka election bad kaba la dep ruh ban plie ïa u maw nongrim naduh myn shym snem.
Ka seng ka ong ruh ka ka donkam ruh ban don ka Governor House ha Jowai na ka bynta ka jingbit jingbiang ki paidbah ka ri lum Jaiñtia, kine ki ar tylli ki jingdawa ki long kiba donkam katkum ka seng kiba lah ruh ban kyntiew ïa ka thaiñ Jaiñtia bad ruh na ka bynta ka jingbit jingbiang ka imlang ka sahlang.
Ka HANM Jaiñtia Zone ka khmihlynti ba ka sorkar kan shim khia halor kine ki jingdawa bad halor kane ka mat jingdawa ka seng kan sa leit ban buh da ka jingthoh hakhmat u myntri rangbah ka jylla u Conrad Sangma, pynkut u kyrwoh na u President HANM Jaiñtia Zone, u bah Shaniahlang Suchen.