Mawkyrwat, K’lyngkot, 17: Ka Mawten Sports Club (MSC) ka la ïoh ban sdang ïa ka IV Mawten Invitation T20 Cricket Tournament 2023-‘24 ha madan Mawpyllun Mawten, South West Khasi Hills District ha kaba ka Mawmitbah Sports Club ka la jop pyrshah ïa ka Kingfisher United Cricket Club da 13 ron.
Ha ka jingsdang ïa kane ka lympung jingïalehkai, ka jingïaleh ka la long hapdeng ka Mawmitbah Sports Club pyrshah ïa ka Kingfisher United Cricket Club, ha kaba ka Mawmitbah SC ka la jop ïa ka toss bad ka la jied ban tied nyngkong bad buh thong tang 108 ron na ki 20 obar bad hap noh baroh 8 tylli ki wiket.
U nongtied uba la ïoh bun ron tam u dei u Sarboklang Jana uba la tied 31 ron katba na ki nongbol ka Kingfisher United CC, u Kyrshankupar Pdahsiej bad u Wanpydap Lyngdoh ki la ïoh ban khur mar 2 wiket.
Ha ka kynti ban beh ïa ka thong, ka Kingfisher United CC ka la lah ban kamai 95 run na ki 19 obar bad hap noh baroh ki 10 wiket. Nangta, u nongtied ba la ïalehkai bha u dei u Kyrshankupar Pdahsiej jong ka Kingfisher United CC uba la tied 23 ron katba u Rifuljen Wanniang u la ïoh ban khur 3 wiket marwei.
Lah ban kdew ba ha kane ka lympung la wan ban ïashimbynta da ki 20 tylli ki kynhun kiba na kylleng kylleng ka jylla bad ka khusnam jong kane ka jingïalhkai ka long T. 60,000/- tyngka.
Ïa kane ka lympung ïalehkai Cricket la ïoh ban plie pyrda da u bah Johnfilter Lyngdoh, District President jong ka NPYF kum u kongsan bad uba dei uwei na ki samla rangbah uba ju kit bad trei ïa ki kam imlang sahlang hapoh ha ka dong ka thaiñ, ha ryngkat ka jingïadonlang u bah Bakhaiñ Nongsiej, Secre-tary South West Khasi Hills District Cricket Association (SWKHDCA), ki ‘riew rangbah jong ka shnong, ki nongïalam bad ki dkhot jong ka Mawten Sports Club.
