Watla ki seng saiñ pyrthei ki la dep ban pynbna ïa ki kyrtong na ka bynta ban pynïakhun ïa ka elekshon Lok Sabha ka ban sa long shen mynta u snem 2024 hynrei ka Bharatiya Janata Party lehse kan long ka seng saiñpyrthei kaba khatduh eh ban shim rai ban pynieng kyrtong kumba ka la leh ha ka elekshon MLA kaba la long ha u snem 2023.
Ki nongïalam ka BJP na kane ka jylla Meghalaya ki la kam ba ki ïoh pdiang ïa ki jingtyrwa na ki katto katne ngut ki briew kiba la pynpaw ïa ka mon ban ïakhun ïa ka elekshon Lok Sabha na Shillong Seat na ka tiket jong ka BJP hynrei haduh mynta ka party kam pat ai ïa kano kano ka jingmynjur.
U Bah Alexander L. Hek uba long ruh u nongïalam jong ka BJP bad uba dei ruh ha kajuh ka por u Myntri ka Sorkar Jylla u la pynpaw ïa ka mon ba u don ka jingangnud ban ïakhun ïa ka elekshon Lok Sabha lada ka party ka ibit ban pynieng ïa u. Nalorkata, wat u President barim jong ka BJP Meghalaya State Unit u Bah Ernest Mawrie ruh u pynpaw ba u don ka mon lada ka party ka ibit ïa u. Bluit, mih sa ka Kong Fenella Nonglait, kaba dei ka Muktiar kaba pynpaw ba ka kwah ban ïakhun ïa ka elekshon Lok Sabha na ka tiket jong ka BJP. Watla ka Kong Fenella kam pat pynïasoh ïalade kum ka dkhot bapura jong ka party hynrei ka la tyrwa monsngewbha ïalade ban ïakhun ïa kane ka elekshon.
Ka jingtyrwa jong ka Kong Fenella ban ïakhun na ka tiket jong ka BJP ka long hadien ba ka la ïohi ïa ka National Peoples Party kaba bat ïa u lakam synshar ha ka Jylla ba ka la pynbna ïa ka kyrteng jong ka Dr. Ampareen Lyngdoh ban pynïakhun na Shillong Seat bad ïa ka Sitting MP ba mynta jong ka Tura Seat ka Agatha Sangma.
Dang shen u National Vice President ka BJP uba peit ïa ka jylla Meghalaya u Dr. M. Chuba Ao u la pynpaw ba ka BJP kan hap ban bishar bniah bin pa bin ïa ki kyrtong kiba tyrwa ban ïakhun na ka tiket jong ka BJP na Shillong bad Tura Seat. Toi, watla ka BJP ka la buh thong mynta ka kynti ban jop haduh 400 Seat ha kane ka elekshon, tip haduh katno, ki paidbah nongshong shnong ka ri bad ha kane ka jylla ki ïohi ïa kita ki jingtreikam ba la shiphew snem jong ka Sorkar National Democratic Alliance (NDA) ba la ïalam da ka BJP.
Katkum ki dak ki shin kiba paw na ka elekshon MLA, ka BJP kan shem jingeh bha ha kane ka elekshon lymda ka ïoh ïa u ne ka kyrtong kiba ïoh ïa ka jingshahniah na ki paidbah. Ngi kynmaw ha u snem 2019 haba ka BJP ka pynieng ïa u Bah Sanbor Shullai kum u kyrtong na Shillong Seat um shym la lah satia ban jop namarba ki paidbah nongthep vote kim pat lah ban ai ïa ka jingshaniah ha ka BJP. Haba bishar ïa ka jingtreikam jong ki lai ngut ki MP ka Jylla, la shem ba ki sting thew, namarba wat tang kawei ruh ka jingdawa jong ki paidbah nongshong shnong ka jylla kim pat lah satia ban urlong wat tang kawei ruh. Ban shu pynbiej ïa u paidbah tangba la shu kren ha Parliament kam long satia kaba shongnia namarba ki paidbah ki tip shai ba ka BJP kan ym sngap satia ïa ka jingdawa jong ka Congress, khlem da ïakren ïa ka NPP watla ka dei ka paralok kaba ïatreilang bad ka BJP hapoh ka kynhun NDA.
Ki san snem ki la kut, bad mynta ka ladei biang ka por ba ki kyrtong kin wan khroh vote da kaba leh smat ban leit khroh biang sa shi wat ïa ki paidbah. U paidbah u dei uba stad bad u ladep ban khien jingkhein bad ban thew sawar ïa ki jingtreikam jong ki kyrtong la ki long kiba rim ne wat ïa kiba thymmai.
Ngin ïa ap sa tang ïa ka por ba ka Election Commission of India (ECI) kan pynbna noh ïa ka Tarik ban pynlong ïa ka General Election ne ka samoi jied syiem hapoh ka ri India baroh kawei khnang ba u paidbah ka Jylla Meghalaya un dup ai noh ïa ka rai ïano ban pynkup jaiñ spong napdeng ki kyrtong ba pynieng da ka VPP, ka RDA, ka NPP, ka Congress bad ka BJP.
Ka NPP ka kam ba ka lah ban jop ïa ka elekshon Lok Sabha ha Garo Hills bad ha Khasi-Jaiñtia Hills namarba ka jingïoh Vote ha ka elekshon MLA ka long kaba heh bha lada ïanujor bad kiwei pat ki seng saiñpyrthei, hynrei kane ka jingkhmihlynti jong ka NPP kan kylla pyrdet lada ki paidbah ki thew sawar bad ki pynshongnia bha ïano ban phah sha ka Parliament na Shillong bad Tura Seat. Lehse, ka NPP kan dang lah ban wan phai ha Tura Seat, hynrei ha Shillong Seat kan long kaba jwat ïa ka NPP namarba ki paidbah ki hap ban peit sha kano ka party kaba lah ban ïoh bat ïa u lakam ban synshar ïa ka ri ha ki san snem ki ban sa wan.
