5th MEGHALAYA GAMES 2024 : ïai tbeh ki samla ka EKHD ban ïohrah ïa ka thong ha kiba bun ki jingïalehkai

Tura, Kyllalyngkot 17: Ka kynhun ki nongïalehkai ba mihkhmat na ka East Khasi Hills District ki la ïai bteng ban kyntiew ïa la ka jong ka District ha ka 5th Meghalaya Games ba la long ha sorbah Tura, West Garo Hills District, da kaba khur jingjop ha katto katne ki jingïakop kiba la pynkut hynne ka sngi Balang. Ki jingïalehkai kiba la lah ban pyndep noh ki kynthup naduh ka Karate, Badminton, Swimming, Gymnastic, Golf. Lah ban kdew ba ki namtam na baroh kidei khambun na ka East Khasi Hills District.
BADMINTON: Lada ngin ïaphai sha ka jingïalehkai ïa ka badminton, ka kynhun ki rang bad ki thei ïalehkai na East Khasi Hills, ki la leit phai sha la iing bad kiba bun tylli ki nam jop, ha kaba ha ka jingïalehkai kaba para marwei jong ki kynthei ka Netanïa T tarïang ka la lah ba kan pynliem noh ïa ka Shimtihum Lyngdoh ka West Khasi Hills bad ka takma rnong la khur ïa ka da ka thei ïalehkai kaba dei na West Khasi Jaintïa Hills bad ka West Garo Hills, katba ha ka jingïalehkai kaba shi jur ne ka doubles jong ki kynthei, ka nam jop ka leit sha ki shi jur ki thei ïalehkai ka East Khasi Hills ba la mih madan da ka Netaniya bad ka Caralinda Nongbri hadien ba ki la lah ban pynliem noh ïa ka Shimtihum bad ïa ka Doreenzïa Kharbani. Jong ka bad ïaka takma rnong na kane ka jingïakob la khur da ki shi jur ki thei ïalehkai jong ka West Jaintïa bad West Garo Hills.
Katba ka resol na ka jingïalehkai jong ki shynrang ka long ba haka jingïakhun kaba para marwei (singles) u lahduh dei u Reynel Kharbuki hadien ba u la lah ba un pynliem noh ïa u Stephan Marwein bad baroh arngut kidei jong ka East Khasi, ka takma rnong na kane ka kyrdan ïakhun ka leit sha ki rang ïalekai jong ka Eastern West bad Ri-Bhoi, ha ka jingïalehkai kaba shi jur (doubles) u Reynel uba la mih madan lang bad u Prathan Majumdar ki la lah ban pynliem noh ïa u Banshabor Lamare bad Lechan Suchïang. Ribhoi katba ka takma rnong la khur ïa ki da ki nongïalehkai ka West Garo Hills.“
Wushu : Ha ka jingïalehkai Wushu kaba la long ha Don Bosco School la khur jingjop da ki district bapher bapher, watla ka East Khasi Hills ka dang dei ka district kaba la lah ban khur bun tylli ki jingjop. Tad haduh ban da wanlam ïa kane khubor ka East Khasi Hills district ka la khur khyndai tylli ki takma ksïar ha ki kyrdan ïalehkai bapher bapher.
Ha ka sub junior boys (45 kg), ïa ka takma ksïar la khur da ka Eastern West Khasi Hills hadien ba la la lah ban pynliem noh ïa ka West Khasi Hills. Katba ïa ka takma rnong la khur da ka East Khasi Hills bad ka South West Khasi Hills.
Ha ka sub junior boys (35 kg), ka East Khasi Hills ka la lah ban pynliem noh ïa ki nongïakhun kiba na South West Khasi Hills bad ïa ka takma rnong la khur da ka Ribhoi. Ha ka junior boys (45 kg), ka South Garo Hills ka la khur ïa ka takma ksïar hadien ba ka la jop ïa ka West Khasi Hills, katba ïa ki takma rnong la khur da ka East Khasi Hills bad East Jaintïa Hills.
Ha ka lïang ka senior men (45 kg), ka Eastern West Khasi Hills ka la ah ban pynliem noh ïa ka East Khasi Hills. Nalor kine ym shym la don shuh kiwei pat ki ban khur ïa ka takma rnong hadien bay m don shuh ki nongïalehkai ha kane ka kyrdan.
Ha ka junior boys (45 kg), ka North Garo Hils ka la jop ïa ka South West Khasi Hills. Ïa ki takma rnong la khur da ka West Khasi Hills and East Khasi Hills.
Ha ka junior girls (45 kg), ka East Jaintïa Hills ka la khur ïa ka takma ksïar, katba ka West Khasi Hills ka la khur ïa ka takma rupa. Ïa ka takma rnong la khur da ka Ribhoi bad ka West Goaro Hills.
Ha ka junior boys (48 kg), ka West Khasi Hills ka la khur ïa ka takma ksïar hadien ba ka la lah ban pynliem noh ïa ka Eastern West Khasi Hills. Ka East Jaintïa Hills bad ka South Garo Hills ki la khur ïa ka takma rnong.
Ha ka Junior girls (48 kg), ka East Khasi Hills ka la khur ïa ka takma ksïar, ïa ka takma rupa la khur da ka West Khasi Hills bad ka West Garo Hills ka la khur ïa ka takma rnong. Haba phai sha ka junior girls (52 kg) la khur da ka East Khasi Hills hadien ba la la lah ban pynliem noh ïa ka West Khasi Hills. Ïa ka takma rnong la khur da ka South West Khasi Hills bad ka South Garo Hills.
Karate: Haba phai sha ki jingïalehkai jong ka Karate, ka kynhun ïalehkai jong ka East Khasi Hills District kynthup ïa ki kynthei bad shynrang ki la ïoh ban kin khur mar san tylli ki takma ksïar ha kaba kut jong ka jingïakhun jong ka Meghalaya Games ha Tura.
Haba phai ha ka lïang ki shynrang, ka East Khasi Hills ka la khur mar saw tylli ki takma ksïar bad rupa abd saw tylli ki takma rnong, katba ha ka lïang ki kynthei ki la ïoh ban kin khur san tylli ki takma ksïar, saw tylli ki takma rupa bd khyndai tylli ki takma rnong. Katba ka kynhun jong ka West Jaintïa Hills District ka la wan ba-ar ha ka lïang ki kynthei bad shynrang da kaba ki la ïoh ban khur mar kawei ka takma ksïar bad rupa.
Ka West Khasi Hills ka la wan balai hadien ba ka la khur tang kawei ka takma ksïar.
Swimming: Ka Pdïangsuklang Syngwan bad u Banpynshngainlang Syngwan kiba long ruh ki ar ngut ki samla jngi um ba la mihkhmat ïa ka Jylla ha ka lympung jong ka National Games kaba la long ha Goa ba la long ha u snem ba la leit, ki la long ki ar ngut ki nongïalehkai kiba kynsai tat haduh ba kin da ïoh ban khur ïa ka nam Best Swimmer.
Ha kaba kut jong ka jingïakop lada ngin ïa phai sha ka jingïoh khur takma ka kynhun ïalehkai ka East Khasi Hills District ka la ïoh ba kan khur 11 tylli ki takma ksïar, 11 ki takma rupa bad 10 tylli ki takma rnong. Bud pat sa ka South West Khasi Hills District kaba la wan ba-ar hadien ba ka la khur mar ar tylli ki takma ksïar bad rupa lem bad 3 tylli ki takma rnong. Katba kiwei kiwei pat ki district kiba kynthup ïa ka Eastern West Khasi Hills, East Garo Hills District bad ka East Jaintïa Hills District kim shym la lah satïa ban ïoh khur ïa ki takma.
Gymnastic: Lada ngin ïa phai pat sha ka jingïalehkai ka Gymnastic, ki nam tam ne nongïalehkai ba kynsai na kiba kynsai tam (all round champion) ha kane ka lympung ïalehkai jong ka Meghalaya Games kaba 5 ba la long ha Tura ki long ba na ka lïang ki shynrang dei u Mebantei Lyngdoh Marshillong bad na ka lïang ki kynthei pat kane ka nam ka la leit sha ka Wansuk Merry Susngi, kaba dei ha ka kyrdan jong ka all round champion mini group, katba ka Wandalang B Malngïang ka la ïoh ba kan rah ïa ka nam ha ka kyrdan jong kiba la heh (senior).
Wrestling: Lada ngin ïa phai pat sha ka ïakob ïa lympat ne ka wrestling, ka khubor ka jingmih paw jong ka sap ba nylla ka long na ka Ringchi K Sangma, Upper Wadanang, West Garo Hill, ka khynnah kaba dang 19 snem ka rta bad kaba pule ha Govt. Boys Higher Secondary School.
Kum ka nongïalehkai ka Ringchi ka dang shu sdang ban pynleit jingmut ha kane ka jingïalehkai hadien ba ka la pynïasnoh ïalade bad ka synjuk jong ka Wrestling Assocïation of WGHD kaba don tang kum, ba 23 ngut ki nongïalehkai bad ba dang shu seng artad ïa ka dang shi bnai mynshwa.
Ka Ringchi, ka la ïoh ïa ka jingshah hikai ha ki coach jong ka synjuk bad dei tad hynnin ka sngi, ba katta ka jingim ïalehkai wrestling ka jong ka, ka la sdang ba kan mih paw hadien ba ka la ïoh ba kan kiew rynsan nyngkong eh ban aireng pyrshah ïa kiwei pat ki thei samla.