Shillong, Kyllayngkot 17: Ka Meghalaya ka la lah ban khur ïa ka namjop lyngba ka Innings bad 51 ron ha ka sngi ïakhun ba saw bad ba khadduh jong ka U-23 Col CK Nayudu Trophy pyrshah ïa ka Manipur ha Surat hynne ka sngi.
Sa shi sien pat, u Manish Sharma u la lah ban ïalehkai bha da kaba pyndep ïa ka jingïakhun da 6/32 naki 31 over. Kumban shu pynkynmaw, u la khur 6/50 ha ka jingïakhun jong ka inning ba nyngkong, bad haba kyllumlang u la khur 12/82 pyrshah ïa ka Manipur, bad na ka liang jong u President ka Meghalaya Cricket Association-Nababrata Bhattacharjee u la ai ka jingïaroh kaba kyrpang ïa u tei u rangkawangbol ka kynhun. Kane ka dei ka sien kaba ar ba u la ïoh ban khur palat 10 wicket, hadien ki 14 wicket ba u la khur pyrshah ïa ka Sikkim ha ka jingïakhun ba nyngkong jong ka Meghalaya. Haba phaidien, ka Manipur kala kamai 257 ron shuwa ban shah pynhap baroh ha ka inning ba nyngkong hynrei ka Meghalaya ka la buh ïa ki sha kyndong da kaba tied 467/10 – ha kaba u Kevin Christopher u ba la kamai 155 ron, kynthup ruh na ki half century jong lai ngut ki player ba kynthup ïa u Nishanta Chakraborty (66), Aman Kumar (65) bad u PM Santhosh (51). Haba bteng ïa ka inning kaba ar hynne ka Sngi ka Manipur ka la shah pyndep noh tang da 159 ron.
Ka Meghalaya kan ïakhun biang sa ïa ka Mizoram ha Nadiad, Gujarat ka ban sdang naduh 21 tarik mynta u Kyllalyngkot.
