Shillong, Kyllalyngkot 17: Ka kynhun ïalehkai jong ka Sawmer bad ka Youngstar CC ki la khur jingjop hynne ka Sngi na ka lympung Shillong Cricket League 3rd division 2024
kaba dang ïaid shait shait mynta ha madan Urkaliar.
Haba phai sha ka jingïakhun kaba nyngkong hapdeng ka Sawmer pyrshah ïa ka Inningstar XI, ïa ka Toss la jop da ka Sawmer bad ka la jied ban tied nyngkong, ka kynhun ka la ïoh ban buh ïa ka thong da 121 ron hadien ba tied pyndep ïa ka 20over, shah pynhap 9 ngut.
Napdeng ki nongtied kiba la kamai bun ron na bynta ka kynhun, ki long u Apbbor Lyngwa, u ba la tied 26 ron naki 22 bol, nangta u Dakerlang Basaiawmait u la tied 19 ron na ki 28 bol.
Haba pyrshang beh ïa ka ron ba la buh, ki rangtied ka Inningstar XI ki la lah ban kynjoh tang sha ka 112 ron bad hap baroh ki wicket hadien ba la ïaid 19.4 over. Na ka liang jong u Aniket Chettri u la lah ban ïalehkai bha da kaba tied 42 ron naki 22 bol hynrei kane kam shym la ïarap ïa ka kynhun ban lait na ka namrem.
Dei ki rangkawangbol kiba la tyngshaiñ ha ka Inning tied jong ka Inningstar XI, ha kaba u Arnold Shadap u la khur haduh 3 wicket na ki 4 over bad shah tied tang 20 ron. Katba u Evanstar Jyrwa u la khur 2 wicket na ki 4 over, shah tied 16 ron kaba la kyrshan radbah ïa ka Sawmer ban jop ïa ka jingïakhun da 9 ron. ïa ka nam Player of the match la khur da u Evanstar Jyrwa u ba la tied 18 ron ryngkat bad ka khur 2 wicket ha ka bol.
Ka jingïakhun kaba ar ka la long hapdeng ka Young Star CC pyrshah ïa ka SMCA, bad ïa ka toss la jop da ka SMCA bad jied ban tied nyngkong. Kane ka kynhun ka la lah ban buh thong 117 ron shuwa ban hap baroh ki wicket na ki 19.2 over.
U Ravi Shankar Kumar u la kamai 37 ron na ki 29 bol katba u Hassan u la kamai 20 ron naki 16 bol. Napdeng ki rangkawangbol ka liang pyrshah, u Ashik Alam (4 over: shah tied 25 ron: khur 3 wicket) bad u Adit Pradhan (3.2 over: shah tied 42 ron: khur 3 wicket) ki dei kiba la seisoh.
Haba jubab ïa kane, ka Young Star ka la pyndep tang ha ka 16 over ban kynjoh sha ka 118 ron, hap tang 4 wicket ban khur ïa ka namjop da 6 wicket. U Md Wahid u la lah ban kamai 46 ron naki 32 bol bad khur syndon ïa ka nam Player of the match.
