Shillong, Kyllalyngkot 17 : Ka Mawjatap Sports Club ym tang ba ka peit bad kyntiew ha kaba ïadei bad ki kam ïalehkai hynrei ka phaikhmat ruh ha kiwei ki bynta kum ha kaban kyntiew ïa ki sap ki phong jong ki samla bad khynnah ha ka rwai ka siaw, ka jingshad bad kiwei kiwei.
Ha ka 15 tarik Kyllalyngkot 2024 ka la pynlong ka jingpynïakop shad ïa kaba la tip kum ka Riwar Mihngi Dancing Competition 2024.
Ïa katei ka jingpynïakop shad la pynlong ha madan Shnong Mawjatap, ha kaba u Bah Nur Nongrum Sordar Shnong Mawjatap u la long Kongsan ha ka jingïadonlang ki longkmie longkpa, ki samla shynrang/kynthei bad ki khynnah.
Ha katei ka jingïakop shad la wan ban ïashimbynta da ki 8 ngut ba kynthup 6 ngut ki kynthei bad 2 ngut ki shynrang. Kiba ïashim bynta ki kynthup i Sunday Suting, Patricia Khongiong, Lovely Mery Nongrum, Enca Shadap, Damehi Khongiong, Ïohkmen Mukhim, Sapna Khongiong“bad i lenisha Khongiong.
Ïa ka namjop ba nyngkong la ïoh rah da i Patricia Khongiong, Sunday Suting ïa ka nam ba ar bad i Sapna Khongiong ïa ka nam ba lai. Ïa katei ka jingïakop shad la wan ban bishar da u samla Welborn Mynsong u tyngshop ki phlim Khasi ïa uba la ju ithuh da u Paheh ha ryngkat ka Badapbiang Mynsong bad u Bah Tensing Khongiong u la ai ki kyntien pdiang sngewbha.
Ha kaba kut jong ka jingpynïakop la sam ïa ki khusnam sha ki nongjop lyngba da ka song pisa.
