Shillong, K’lyngkot, 16: Ka President jong ka ri India, ka Droupadi Murmu ha ka sngi Baar ka la plie paidbah ïa ka jingpynheh ïa ka surok Rongjeng Mangsang Adokgre bad ïa ka surok Mairang Ranigodown Azra bad ka la buh ïa ki maw nongrim jong ka Shillong Peak Ropeway bad ki jaka sah ki nongjngoh kai ha Khongthong, Mawlyngot bad Kudengrim lyngba ki lad digital.
Haba kren kum ka Kongsan ka President ka la ong ba naduh ki por hyndai, ki riewlum ki dei kiba ïada ïa ka mariang katkum ki jingnang jingstad, ka deiriti bad ki jingngeit tynrai. Ka la ong ba ki briew jong ka Meghalaya ki ngeit ba ‘U Basa’ lane u blei ka shong ha ki khlaw ki btap. Ka la ong ki rukom treikam jong ki riewlum ki lah ban ai nuksa shaphang ka jingïadei kaba jan hapdeng ki briew bad ka mariang. Ka la ong ba ka rukom im ki riewlum ka don bynta ha ka jingkyntiew ïa ki thong jong ka ri kiba ïadei bad ka jingpynneh ïa ka spah mariang bad ka jingpynneh ïa ka jingryntih ha ka mariang.
Ka President ka la ong ba ki longkmie ki don ka bynta kaba heh ha ka jingïada ïa ka mariang bad ki kam ban ïaleh pyrshah ïa ka jingkylla ka suinbneng. Ka la ong ba ka la paw shai ba ki longkmie ki don ha ka jaka Pdeng jong ki kam pynneh. Ki longkmie ha ka imlang sahlang jong ki riewlum ki la ïalam lynti ha ka jingïada ïa ka mariang bad ki la ïasam ïa ki jingnang jingstad jong ki ban kyntiew ïa ka jingpynïahap bad ka jingpynduna. Da kaba kyntiew ïa ka jingïashim bynta ki longkmie ha ki sienjam kiba ïadei bad ka mariang bad ki kam shim rai, ngin lah ban trei kham bha ha ki sienjam ban ïada na ka jingkylla ka suinbneng bad ruh ka jingpynneh ïa ki spah ka mariang.
Ka la ong ba ka kmen ba ka Meghalaya ka la shim ïa ki sienjam ban long ka jylla ba ai nuksa bad kaba pyni ïa ka jingpynryntih ïa ka jingkylla sha ka juk mynta bad ruh ka jingbat ïa ki rukom tynrai. Ka la ong ba lyngba ka jingwan ka FDI, ka jingshalan mar shabar bad ki briew kiba don sap, ka Meghalaya ka la kylla sha ka nongïalam ha ka roi ka par bad ka ai mynsiem ruh ïa kiwei.
