Ka jingpynkupbor ïa ki longkmie kan pynurlong ïa ka thong shwa u snem 2047: President Murmu

Shillong, K’lyngkot, 16: Ka President jong ka ri India, ka Droupadi Murmu ka la ïakren bad ki dkhot jong ki Self Help Group ha ka kad liengsuiñ Baljek, Tura, ha ka sngi Baar bad buh ruh ïa u mawnongrim na ka bynta ban tei ïa ka Integrated Administration Complex, Tura ba thymmai lyngba ki lad digital.
Haba kren kum ka kongsan, ka President ka la ong ba ka jingpynkupbor ïa ki longkmie ha ki kam ka imlang sahlang, ka ïoh ka kot bad ka saiñ pyrthei ka long kaba donkam bha na ka bynta ka jinpynurlong ïa ka jingthmu jong ka ri ba kan long kaba la kiew shaphrang shuwa u snem 2047.
Ka la ong ba ki longkmie ka India ki la pawkhmat bad ki la prat lynti ïa kiwei kiwei ki longkmie ha ki kam bapher bapher kum ka jingïada ri, ka science bad teknoloji, ki kam ïalehkai, ka pule puthi, ka jingseng kam lajong, ki kam rep bad kiwei kiwei ki kam. Ki donkam tang katto katne ki kyntien, ki jingpynshlur bad ka jingïaroh.
Ka President ka la ong ba lah ban pyntreikam ïa ka jingthmu ban don ka roi ka par kaba ïalam lynti da ki longkmie lada ki ïoh ka lad ban jied. Haba don ka jinglaitluid ha ki kam ka ïoh ka kot, kane ka la urlong katto katne. Ka jinglah kyrshan ïalade ha ka ïoh ka kot ka wanrah ïa ka jingskhem jingmut ha ki longkmie.
Ka President ka la ong ba ka Sorkar India ka leh katba lah ban pynthikna ba ki longkmie ki don la ka bynta ha ka roi ka par bad ka jingkyntiew ïa ka ïoh ka kot jong ka ri. La shim katto katne ki sienjam ban kyntiew ïa ka jingïashim bynta ki longkmie ha ki kam. Ka Sorkar ka la shim ïa ki sienjam na ka bynta ka jingkyntiew ïa ki longkmie ha ka imlang sahlang bad ka ïoh ka kot, bad ka la shim ruh ïa ki sienjam kiba heh ban pynthikna ïa ka jingïadon bynta jong ki ha ki kam saiñ pyrthei. Hynrei ka kam ka dei kaba dang bun ha ka jingpynkupbor ïa ki longkmie. Ka la kyntu ïa ki briew ba kin sdang ithuh ïa ka jingkordor bad ka jinglong tynrai jong ki longkmie bad ruh ba kin ai jingkyrshan ïa ki.
Ka President ka la kyntu ïa ki dkhot jong ki SHG ba kin bteng ban jam shaphrang bad ruh ba kin ïalam lynti ïa kiwei kiwei ki longkmie. Ka la ong ba kane kam dei ka jingïaid lynti jong ki shimet hynrei ka dei ruh ka jingïaid lynti jong ki longkmie jong ka ri ki bym pat shim ïa ki kabu kiba don shabar ka iing jong ki. Ki dei ban long kiba ai mynsiem ïa kiwei kiwei ki longkmie na ka thaiñ jong ki bad ruh na baroh kawei ka ri.