Shillong, K’lyngkot, 16: Ka Sports Committee jong ka Khasi Students Union (KSU) hadien ka jingïoh ujor na kiba bun ngut ki nongïashim bynta ha ka Meghalaya Games 2024 bad na ki kmie ki kpa, ka seng ka pynpaw ïa ka jingpyrshah kaba jur halor ka jingbym kheiñ snep ka Sorkar Jylla ïa ki nongïalehkai.
“Ka jingbympynbiang ïa ka bam kum ka ja step bad ja sngi, ka jingai beiñ ki jingbam tad dor kum ki chips, ki shana khutia mutia bad ka jingleh sih pathar kan buh ïa ka koit ka khiah kitei ki nongïalehkai ha ka jingma,” la ong u kyrwoh na u Sports Secretary ka KSU CEC u Samla Eric Nongkynrih.
“Ha ka jingshisha, ka sorkar ka la dei ban pynbiang da ka bam ka dih kaba tei met, kum ki ruti bad makhon, dud, kait bad kiwei ki jait jingbam ha ka por step bad pynbiang thikna ruh ka ja ka doh ha ka por sngi bad miet hynrei phewse ka la ai pynban ka bam kaba wat ki mraw ne ki koidi ruh kim bam,” la bynrap u kyrwoh.
Ka Sports Committee ka KSU ka sngew ba lada ka Sorkar Jylla ka thrang shisha ban kyntiew ïa ka lehkai sports ha jylla khnang ba kan long kum ka lad kamai jakpoh bad kumjuh ruh khnang ba kin ïoh ïa ki takma bapher bapher ha ka National Games bad ki rynsan international, ka dei ban pynbit pynbiang bha naduh ki jaka sah, ka bam ka dih, ka transport lem bad kiwei kiwei ki jingdonkam ba kongsan ki nongïalehkai.
“Lada ka Sorkar ka ïai bteng ban leh torti kumne ka mut kan pynduh mynsiem ïa shibun ki samla ba thrang ban kiew ha ka sports bad wat ki kmie ki kpa kin ym shlan ban pynshlur ïa la ki khun ki kti ban minot ha ka sports,” la ong u kyrwoh.
“Ka KSU ka kyntu ïa ka sorkar ban ym kheiñ dew thala ïa ka sports ha ka jylla hynrei ka dei ban pyni da ki kam ha baroh ki liang ban ïarap bad kyntiew ïa ki nongïalehkai sports ka jylla khnang ba ha kawei ka sngi kin lah ban wanrah nam bad burom ïa ka jylla baroh kawei,” la pynkut u kyrwoh.
