Shillong, K’lyngkot, 16: Ka Jylla Meghalaya ka la ïoh pdiang ïa ka National Startup Awards, 2022 kum shi bynta ka jingrakhe ïa ka National Startup Day kaba la long ha ka sngi Baar.
Ka Meghalaya ka la ïoh ïa kane ka khusnam hadien ba ka la shah jied kum ka Best Performer ha ki snem baladep.
Kane ka jingjop ka dei ka thong ba ïohi jngai jong u Myntri Rangbah. Dang khyndiat snem, ka Jylla Meghalaya ka la mad ïa ki ar tylli ki jingïapher. Ha kawei ka liang ka Jylla ka don ïa ki nongshong shnong palat 72% kiba dang hapoh ka 35 snem ka rta. Ha kawei pat ka liang, ka don ruh ka jingduna ïohkam ban pynmih da ki karkhana.
Kum u briew uba la long ruh u nongsengkam, u Conrad Sangma u la shim ïa ki sienjam ban pynkylla ïa ki samla kum ki nongsengkam ha ka jaka ki nongwadkam. U la lamkhmat ruh ban pynsdang ïa ka Meghalaya Startup Policy 2018. La wanrah nyngkong eh ïa kane ka jingthmu ban pynlong ïa ka jylla ka ‘India’s leading startup hub by 2023”.
Da kaba beh ïa ka thong, ka Sorkar Jylla la pynbna paidbah ïa ka PRIME (Promotion & Incubation of Market-driven Enterprises) program ha u snem 2020 na ka bynta ka Startup Ecosystem. Ka Chief Minister’s E-Champion Challenge bad ka PRIME Incubation program ki dei ki ar tylli ki mawdong jong kane ka jingtrei shitom.
Lyngba kane ka prokram la lah ban ai jingkyrshan kumba 5,500 ngut ki nongseng kam bad palat 200 ki Startups. Bun na kine ki la ïoh pdiang ïa ki song jingïarap lyngba ka ram kaba khlem oh satia ïa ka sut.
Ïa mynta bun tylli ki ‘PRIME Hubs’ kiba la seng ha kylleng ka jylla ha kaba ki nongsengkam ki ïoh ïa ka jingkyrshan na ka bynta ban pyntreikam ïa ki jingthmu ha ki kam ki jam. Kine ki PRIME Hubs ki long ruh kum ki jingplie lad ban pynïaid iew ïa ki mar ki mata ba la pynmih da ki nongsengkam ym tang ha ka jylla hynrei wat shabar ka jylla.
Ha u bnai Nohprah 2023, ïa u soh ñiamtra la die paidbah tang ha ki lai sngi ha ka ‘Zest Fest’ kaba la long ha Bangalore. Shwa une u snem, u Sohtrun bad bad u shynrai Lakadong na ka jylla la pynïaid iew sha ki ri Middle East.
Da kaba ithuh ïa ka jylla Meghalaya kum ka jylla kaba ai jait sha ki kynthei, 20% na ka jingkyrshan pisa la tyrwa lyngba ka PRIME program ba la mang kyrpang thik tang sha ki nongseng kam kynthei. Bun na ki kynthei ki la ïoh jingmyntoi na kane ka jingkyrshan bad ïa mynta ki pynïaid ïa ki shlem thaiñ jaiñ bad kiwei kiwei ki kam.
Ban rah ïa ka PRIME program sha ka sienjam kaba bud, ka Sorkar Jylla ka la pynbna paidbah ïa ka CM-ELEVATE program ha u snem baladep, Ka thong jong kane ka prokram ka long ban ai jingkyrshan ïa ki 20,000 hajar ngut ki nongseng kam ha ki san snem ki ban sa wan bad 35% haduh 75% ka jingai subsidy na ka bynta ka projek ha ki 15 tylli ki jait kam. Ki nongaplai ïa kane ka skhim ki don mynta palat 30,000 ngut.
Kum ka nonglamkhmat ha ka Top Performing State Award, ka Meghalaya ka la paw kum ka ‘Focus State’ ha ka World Food India 2023 kaba la long ha New Delhi ha u Naiwieng, 2023. Ha u Kyllalyngkot mynta u snem, ka Jylla ka la ïoh ïa ka khusnam kaba ar ha ka One District One Product (ODOP) Awards kaba la long ha Aatma Nirbhar Bharat Utsav 2024 ha New Delhi.
Ïa kine ki jingtrei shitom jong ka jylla Meghalaya khamtam eh ha kaba kyrshan jingïarap pisa ïa ki Startups bad ïa ki Incubation & Mentorship la ai jingithuh ruh da ka Sorkar India. Ïa ka khusnam la pdiang da u Commissioner Secretary ka tnat Finance & Planning ka Sorkar Jylla u Dr. Vijay Kumar na u Myntri ka Sorkar Pdeng uba peit ïa ka tnat Commerce & Industry u Piyush Goyal ha ka jingïalang kaba la long ha New Delhi.
