Yn pynlong ka MCA ïa ka Meghalaya International Open Grandmaster Chess Tournament kaba nyngkong ha Shillong
Shillong, Naiwieng 19: Hynin ka Sngi Saitjaiñ jong ka taïew ba ladep ka Meghalaya Chess Association ka la pynbna ba kan sa pynlong ïa ka Meghalaya International Open Grandmaster Chess Tournament kaba nyngkong ha Shillong ba la pyntip da u General Secretary jong ka MCA haba ai jingkren sha ki lad pathai khubor.
La pyntip ba ka jingïalehkai kan long ha ki ar category. Na bynta ka Category-A ki player kiba lah ban ïashimbynta ki dei tang kito ba don rating naduh 1600 shaneng. Katba ha ka Category-B kiba don hapoh ka 1599 rating bad ruh ki bym pat don rating ki lah ban shimbynta ha kane ka thup.
Kane ka lympung kan pynshlur ïa ki khynnah hapoh ka jylla namar kane kan dei ka sien kaba nyngkong ba ka jylla kan pdiang bad pynlong ïa ka rynsan ïalehkai Chess kaba yn sa wan ïashimbynta ki player kiba na ki ri shiliang duriaw. Bad ruh kan long ka lad ïa ki nongïalehkai ka jylla ban kyntiew ïa ka International rating lyngba kane tournament.
Kane ka lympung kan sdang ha ka 12 tarik haduh ka 20 tarik Nohprah, 2023, hapoh SAI STC Indoor Sports Stadium, Shillong bad ka prize ha baroh ar Category ka long haduh 30,01,000, kata na bynta ka Category A kan long haduh 20,0,000, katba na bynta ka Category B kan long haduh 10,01,000.
Shuh shuh, na ka liang jong ka MCA ka la pynpaw ba kam dei kaba suk ban ïoh ïa kane ka Grand Master International Chess Tournament namar ba bun ki jylla ka ri India kiba ïaknieh ban ïoh pynlong ïa kane hynrei na ka liang jong ka All India Chess Federation ka la ibit ïa ka MCA shuwa ba kan pynkupbor ïa kane ka synjuk ban pynlong ïa kane ka rynsan ka ban sdang naduh ka 12 tarik Nohprah.
La pyntip ba ka jinglut jingsep ha kaba ïadei bad ka jingpynlong ïa kane ka rynsan kan kot haduh 1 klur tam eiei, ka MCA ka la pynpaw ruh ba ka la ïoh ka jingkyrshan ha kaba ïadei bad ka pisa na ka Directorate of Sport bad ruh na ka All India Chess Federation ban pynlong ïa kane ka lympung kaba ïaid beit ïaid ryntih.
Ha kaba ïadei bad ki ri ki ban wan shimbynta ha kane ka tournament ki kynthup napoh USA, Vietnam, Uzbekistan, Bangladesh, Srilanka, Egypt, Zambia, Thailand bad kiwei kiwei, bad na ka liang jong ka synjuk ka la ïathuh ruh ba ka Entry sha kane ka lympung ka dang ïaid bad ka tarik kaba khadduh kan long ha ka 1 tarik Nohprah. Kin don ruh ki Grand Master kiba la ai kyrteng ban wan ïashimbynta ha kane ka tournament..