Shillong, Naiwieng 19: Ka kynhun ïalehkai jong ka Shillong Lajong ka la ïoh ban khur ïa ka namjop kaba nyngkong mynta ka samoi 2023-24 I-League bad kane ka la wan pyrshah ïa ka Gokulam Kerala da 3-1 kol.
Ka la long ka jingïakhun kaba itynnat hapdeng kine ki ar kynhun naduh kaba sdang jong ka jingïalehkai ha kaba ka Lajong ka la ñion ïa ka Gokulam ha ryngkat ka jingkyrshan ki paidbah kiba la dap mam hapoh stadium.
Ka kynhun ka la ïoh ban lamkhmat ha ka minit kaba 30 lyngba u Daniel Gonçalves lyngba ka jingïarap pynrung bol u kapten ka kynhun, u Hardy Cliff Nongbri. Hynrei na ka liang jong ka Gokulam ka la ïakhun tyngeh bad ïoh ban pynphai shuwa ban kut ka kylla step, kata ha ka 43 minit na u Nili Perdomo. Kaba la pynlong ïa kine ki ar kynhun ban ïakhaid da mar 1-1 kol ha kaba kut jong ka kylla kaba nyngkong.
Hadien ba la jam sha ka jingïakhun ka kylla kaba ar, na ka liang jong ka Lajong ka la wanrah katto katne ki jingkylla bad ïai bteng ban ñion ïa ka Gokulam bad sa shi sien pat ka la ïoh ban lamkhmat ïa ka jingïakhun lyngba ka penalty hadien ba u Phrangki Buam u la shah pynur hapoh ka jylli kol jong ka Gokulam , bad ïa kane ka penalty la shut da u Renan Paulino De Souza.
Na ka liang jong ka Gokulam ka la pyrshang hi katlah katïai ban ïoh pynphai hynrei dei pynban ka Lajong kaba la ïoh thep kylla lyngba u Hardy Cliff Nongbri ha ka 90+8 minit shuwa ban kut ka jingïalehkai.
Lyngba kane ka namjop, ka Shillong Lajong ka la ïoh ban kyntiew 6 point na ki saw sien ïakhun kiba la dep, bad mynta ka la kiew sha ka kyrdan ba 6jong ka miej bad kin pynkhreh ban aireng pyrshah sa ïa ka Delhi FC la sngi Balang (22 Tarik Naiwieng) ha ka por 2 baje nohphaisngi ha madan SSA Stadium, Shillong.
