Mawkyrwat, ‘Naiwieng 19: Ka Langsning Football Club ha ka sngi saitjañ jong ka taïew ka 18 tarik u ‘Naiwieng, 2023 ka la khyrwit haduh 5 tylli ki kol pyrshah ïa ka Khliehmawlieh Youth’s Club ha ka lympung ïalehkai kynjatbol ba la tip kum ka XVI Mawlangwir Invitation Football Tournament (MIFT) 2023-24 ha madan Rowell Lyngdoh Stadium, Mawlangwir, South West Khasi Hills District.
Ha ka jingïalehkai hapdeng kitei ki ar tylli ki kynhun ka la long ka jingïalehkai kaba itynnad bha ha kaba ki nongïaleh ki la ïaleh da ka mynsiem ban pynpoi ïa la ka jong ka kynhn sha ka thong jong ka jingjop. Ha ka jingïakhun, na ka liang ka Langsning FC ka la ïoh ïa ka kol kaba nyngkong ha ka minit kaba 20 kaba dei ha ka kyllastep lyngba u Overkindness Mawnai.
Haba wan biang ha ka jingïalehkai jong ka kyllamiet, ka Langsning FC ka la sdang ban leh bha kham shuh shuh ha kaba ka la ïoh biang sa saw tylli ki kol kata na Overkindness Mawnai ha ka minit kaba 49 bad 74, na u A. Marweiñ ha ka minit kaba 41 bad na u W. Marbaniang ha ka minit kaba 58.
Watla da ka jingthep jong ka Langsning FC haduh 5 tylli ki kol, ka Khliehmawlieh YC kam shym la duh jingkyrmen hynrei da ka jingïakhun tyngeh ka la ïoh ban thep ar tylli ki kol kata ha ka minit kaba 70 bad 91 na u R. Dkhar.
Kumta haduh kaba kut jong ka jingïalehkai, ka Langsning FC ka la jop noh da 5 – 2 kol pyrshah ïa ka Khliehmawlieh YC.
