Shillong, K’ Lyngkot 02: Ka Parish U Khrist Jingshai Marbisu, kan sa rakhe ïa ka sngi jingpynkut ïa ka jingdap 75 snem (Platinum Jubilee) jong ka jinglong Parish ha ka 05th tarik mynta u bnai 2025, ka ban sdang da ka Mass bakhuid ha ka por 10:30 baje mynstep ha kaba u Most Rev. Archbishop Victor Lyngdoh un sa long u Kongsan, ka ban bud sa ka Jingmane Sakramen bad tamasa lehkmen Jubilee ha ka por 01:00 mynsngi.
Kum ka Parish ha ka kyrteng jong u Rev. Fr. J. Shylla (Parish Priest) ha ryngkat bad ki Paidriewngeit ka Parish ka khot ka wer sngewbha ïa baroh ki Paidriewngeit na baroh kawei ka jylla naduh Shillong, Nongstoiñ bad Jowai diocese ba kynthup naduh ki Nongïalam Parish bad Paidriewngeit jong ki Parish bapher bapher jong ka jylla (Longkmie, Longkpa, Samla bad Hep barit) ban ïasnohkti lang ban ïakmen lang bad ka Parish ha kane ka sngi.
Kum ka Parish ka lah pynkhreh ruh ïa ki jaka ïeng kali kiba biang ban suk ka leit ka wan bad halor kane, na ka bynta kiba wan na ka surok ba wan na sor Shillong kin leit beit sha Mawngap, kiba wan na ka surok Nongstoiñ Highway kin wan na Ladmawreng ba rung beit sha Mawngap, bad kiba wan na ka surok Mawkyrwat South West Khasi Hills kin sa ïeng kali ha Mawngap Mawkharsiing, bad kiba wan na ka surok Sohïong kaba rim kin wan beit sha Saitkhlieh Mawngap Gate. Ka Parish ka kyrpad rit ruh ïa ki Paidriewngeit kiba wan sha kane ka sngi jinglehkmen ba lada ki lah kin sngewbha ban teh ïa ki lama lieh ha ki kali ban dup suk ban pynithuh ban pynrung ïa ki kali ha ki jaka ba dei.
Ka Parish ka kyrpad rit ruh ïa ki Paidriewngeit kiba sah ha shnong Mawngap, Laitpynter bad Marbisu ba kin nym wanrah kali khnang ban pynsuk pynbiang ïa ki jaka ïeng kali, ong ka kyrwoh na Fr Jameris Shylla Parish Priest bad u Bah Simon Rani General Secretary jong ka Parish.
