Khliehriat, K’Lyngkot 02 : Ka ophis jong u Waheh Shnong Bataw East Jaiñtia Hills District myn ha ka 23 tarik u bnai nohprah 2024 ka la pynlong ïa ka prokram Development Programme 2024 ha kaba u Deputy Commissioner ka East Jaiñtia Hills District, u Shivansh Awasthi, IAS u la long kum u kongsan.
La ong ba lyngba ka Village Development Council kaba ju kdup bad kaba ju peit bad pyniaid beit ïaid ryntih ïa ki tnat treikam ha shnong ha thaw ba kynthup naduh ki Sub-Committee bapher bapher, ki kynhun treimon sngewbha kiba na ki dong bapher bapher jong ka shnong Bataw myn ha katei ka sngi ka 23 tarik u nohprah ki la ïa mih ryntih bad ïa donbynta lang ha katei ka prokram ba la pynlong ha ïing Dorbar Hall ba don ha ka dong Umlatyap ha Bataw”
Na ka liang u Shivansh Awasthi,IAS u la pynpaw ka jingsngew kmen halor kane ka jingshah khot sngewbha na ki nongïalam Shnong ha kane ka program kaba don jingmut bad ong ruh ba u Waheh Shnong, u bah Deihok Sumer u la ju pynsngew ha u man ka por haba iakynduh ha ophis treikam u DC ha Khliehriat.
U kongsan u la kren ruh shaphang ka jingdonkam ka jinglehkhuid kaba pynitynnad ïa ka shnong ka thaw bad kaba thung ïa ki tynrai dieng ha shilynter ka surok ha poh shnong bad kane ka long ruh kum shibynta kaba lah ban khring ïa ki briew kiba na bar ban wan peitkai ïa ka shnong ka thaw bad kyntu ruh ïa ki nongshongshnong ban don ka jingïatreilang bad ki bor pynïaid shnong kumjuh ruh bad ki tnat sorkar.
Na ka liang u bah Deihok Sumer u la ong ba ka sorkar lyngba ka ophis jong u Deputy Commissioner ka dang leh lyndet ïa ka shnong Bataw ha kaba ïadei bad ka jingleit jurip ïa ka surok 4-Lane kaba la thmu ban pyntrei da ka NHIDCL “Lada long kumno kumno ruh ka sorkar kam dei ban shu leh kiar ïa ka Dorbar Shnong namar katei ka surok 4-Lane ka dei ban ïaid lyngba na ka shnong Bataw katba ka shnong pat ka khlem pat ioh pdiang kano kano ka shithi ne ka notice na ki bor ba dei peit bad kumta halor kane ka jingiaidlait ka sorkar na ka liang ka Dorbar Shnong kan ïa nang iai buddien ba ka ophis jong u Deputy Commissioner ka East Jaiñtia Hills District ka dei ban shimkhia ïa ka jingdawa ka shnong”
U BDO, u Dr T Shylla, u la iathuh ba ki nongïalam shnong man ka por ki ju wan iakynduh ïa u ha ophis treikam na ka bynta ki kam pynroi hapoh shnong bad u la kular ruh ba katba shah ka lad un iarap ïa ka shnong Bataw ban wanrah ïa ki kam pynroi haph shnong kum ki skim sorkar kiba lyngba ka MGNREGS bad na kiwi de ki skim kiba iadei bad ka ophis u BDO.
Ïa ka prokram ha katei ka sngi la pynïaid da u Chairman Shnong Bataw, u bah Bhalang Suchiang bad Waheh Shnong pat u bah Deihok Sumer ha kaba u la pynshai ruh halor ka jingthmu jong kane ka Program bad ong ruh ba donkam ban ioh ki lad ki lynti na ka sorkar ha kaba iadei bad ki kam pynroi hapoh shnong, kum ki jaka bret ñiut kiba paka, ki jingiarap ba pynbha ïa ki sawdong sawkum jong ka ïing Dorbar Hall, kumjuh ruh ki lad ban kyntiew ïa ki kam ialehkai sport ban ialam lynti ïa ki khun shnong kiba don ki sap bapher bapher.
Kiba la ai jingkren ki kynthup ruh u Secretary Dong Border Bataw, u bah Sngewhame Sumer, u Secretary ka Bataw VEC, u bah Waster Sympli bad u Secretary Shnong Bataw, u bah Nehlang Suchiang, la pynshongshit ïa kane ka prokram da ka jingshad tynrai na ki nongïalam bad ki dkhot jong ki Village Organisation jong ka shnong Bataw.
