10 lak kular u MP ban ïarap ïa ka KNIKMS ha ka lyngkhuh sngi ïap 162 snem u Kiang Nangbah
Jowai, K’Lyngkot 02 : Ïa ka lyngkhuh sngi ïap ba 162 snem jong u Khlawait ka Ri Jaiñtia u Woh Kiang Nangbah la rakhe pyndon burom ha ka Lah sngi U Blei ha Kiang Nangbah Memorial Park Madiah Kmai Blai, harud jong ka Wah Syntu Ksiar, ïa ba la pynlong da ka Kiang Nangbah Ïasiat Khnam Memorial Society (KNIKMS), Jowai.
Ha kane ka sngi u MP ka Rajya Sabha Dr. Wanweiroy Kharlukhi ula long kum ka kongsan ha ryngkat ka jingdonlang jong u MDC Bah Saron Paswet, u President ka KNIKMS Bah C. Najiar, ki nongkitkam ka KNIKMS nalor ki paidbah
U Dr. Kharlukhi haba ai jingkren ula pynsngew khyndiat shaphang ka thma pyrshah ïa ki Phareng kaba la khie ha ka por ba ïalam da u Woh Kiang Nangbah uba la lah ban pynïoh ïa ka jinglaidluid ïa ka ri hi baroh kawei.
Ha kajuh ka por ula kular ban pynïoh jingïarap ïa ka Society da kaba pynbna haduh 10 lak tyngka lyngba ka skim MP na ka bynta u snem 2025-26. U la kyntu ïa ka Society ba kan nang bteng ïa kine ki kam ba bha ban pynsah kynmaw ïa u Khla wait ka Ri u Woh Kiang Nangbah bad ban wad kham bniah shuh shuh. U la pynkymmaw ruh shaphang ka jingïaleh kum u nongïalam sengbhalang ban dawa ïa ki jingmyntoi na ka bynta ka Ri-Lum Jaiñtia.
U la ong ka jingpoi jong u sha kane ka kyrdan kum u MP ka dei lyngba ka jingkyrshan borbah jong ki nongshnong shnong ka ri-lum Jaiñtia, da kaba kular kiba bun hi ki skim jong u kin leit beit shapoh ka ri Jaiñtia.
U Dr. Kharlukhi ula leit ban buh ruh ïa u syntiew ha trai jong u mot u Kiang Nangbah bad pynher ïa ka lama jong ka Kiang Nangbah Ïasiat Khnam Memorial Society ryngkat ka jingïashim bynta lang da ki dkhot jong ki seng bhalang bapher bapher kynthup ïa ka BAM-JH.
La pynphuh pynphieng shuh shuh ïa kane ka sngi da ki jingshad pliang, ki jingrwai kyrpang bad kiwei bad la sam ruh ïa ki khusnam sha ki nongjop haka jingïasiat khnam ha ki kyrdan bapher bapher ba la pynïaid da ka KNIKMS.
Shwa kane, ha ka por mynstep la rakhe pyndon burom ïa kane ka lyngkhuh sngi ïap ba 162 snem jong u Kiang Nangbah ha madan Mynkoi Pyrdi Iongpiah, Jowai ba la pynkhreh da ka Seiñ Raij Jowai.
Ha kane ka prokram u Lat ka jylla u C.H. Vijayashankar ula long kum ka kongsan ha ryngkat ka jingdonlang u President ka Sein Raij Bah Hercules Toi, General Secretary Bah Arwotki Sumer, u Dolloi ka Elaka Jowai Bah Puramon Kynjing nalor kiwei kiwei.