Shillong, Naiwieng 17 : U Bah Banteidor Lyngdoh u la ong ba ka sorkar jylla lyngba ka tnad ïalehkai kan sa pynkup burom ïa ki nongïalehkai kiba la khur takma ha ka 2nd North East Olympic Games 2022 kaba dang shu kut ha ka sngi Balang hangne ha jylla Meghalaya.
“Nga ai khublei ïa ki khynnah samla jong ngi kiba la ïoh ban rah ïa ka nam bad ka burom na bynta ka Jylla na bynta ka ïing ka sem jong ki bad na bynta ka shnong ka thaw. Ka long kaei kaei ka burom ba ki khynnah ki la ïoh ban khur shibun ki takma na ki jait jingïalehkai bapher bapher,” ong u Bah Banteidor Lyngdoh haba ïakren bad ki nongthoh khubor hynne ka sngi Palei.
“Kane kadei ka lynti kaban plie lad plie lynti na ka bynta kiwei pat ki lympung ïalehkai, la ka long ha ka National Games bad ruh ha ki international ba ki khynnah jong ngi kin ïoh ban leit ïashim bynta. Nga da sngewkmen ba ka North East Olympic Games ka long kaba ïaid beit ïaid ryntih bad kaba jop bad ka jingsngewnguh ka leit sha ki nongshong shnong, namar kadei lyngba ka jingkyrshan bad wan ai mynsiem ki paidbah kane ka lympung ka la long kaba jop bad kane kadei ka jingsdang ba ki khun samla jong ngi kin nang ïai kiew shaphrang,” u la ong.
Haba kylli la hato ka sorkar kan pynkup burom ne em ïa ki nongïalehkai kiba khur takma, u Myntri u la ong, “Kata kadei ka bynta kaba ngi hap ban leh ym lah shuh ban ong ban lait namar ngi la leh ïa baroh bad ngi hap ban leh ïa kane ruh namar kane kadei kawei kaba ngi la dep ban pruid dak lyngba ka jingwanrah ïa ka sports polisi. Lyngba ka sports polisi ngi ïoh ban pynkup burom ïa ki nongïalehkai jong ngi kiba wanrah takma kiba wanrah burom ïa ka jylla hi baroh kawei.”
“Kumba ngi la pynkup burom ïa ki samla kiba la khur takma ha ki jingïalehkai international bad mynta ka kynti ruh ïa kiba jop takma ha ka North Eat Olympic Games 2022 na bynta kine ruh ngin sa pynlong ka prokram na bynta ba ngin pynkup burom kumba ngi leh lang ïa kiwei kiwei khnang ba kan long ka jingai mynsiem shuh shuh, ngin nang kyntiew shuh shuh namar khlem ka jingai mynsiem na ka sorkar bad ka jingkitbok kitrwiang kan long ka jingduh mynsiem,” ong u Bah Banteidor da kaba bynrap ba halor kane ka sorkar kan sa pynbeit ïa ka sngi ban pynkup burom.
Kum ban kdew hangne ba ka Meghalaya kaba dei ka trai jaka, ka la pyni shisha sha ka pyrthei ba ka la kiew stet ha katei ka lympung namar na ka kyrdan kaba hynriew kaba ka don ha u snem 2018 mynta pat ka la kiew sha ka kyrdan kaba saw mynta u snem da ki 36 tylli ki takma ksiar kaba long haduh 12 shah na kaba ki ïoh ha u snem 2018. Ha kane ka kynti kaba mynta ka Meghalaya ka la ïoh ruh ban khur haduh 35 tylli ki takma rupa bad 78 tylli ki takma rnong.
