Shillong, Naiwieng 17 : La pynkut noh ïa ka Lympung ïalehkai ka North East Olympic Games kaba ar da ka jingjop hapdeng ka jingiphuh iphieng ha Shillong ha ka janmiet jong ka sngi Balang. U Myntri Rangbah u Conrad Sangma haba kren ha kane ka sngi u la ong, “Nga pdiang sngewbha ïa baroh sha ka jingpynkut ïa kaei ka ban pynsahnam ïa ka histori ka Meghalaya. Nga lah ban ong da ka jingsarong bad jingkut jingmut, ba ka North East Olympic Games kaba ar ka la long ka jingjop bakhraw.”
“Ka jingpynlong ïa kane ka lympung ka long ka jingphla ïa kaei ba ka thaiñ shatei lam mihngi ka lah ban leh bad ki dak ïa kaei ba ka thaiñ shatei lam mihngi ka lah ban ïoh ïa ka jingjop ha ki por ban wan. Nga kwah ban pynsngew ha phi baroh ba ka la don ka jingpyrshang na sha lyndet jong ka Team Meghalaya ban pynïaid beit ïa kane ka lympung ban pynlong ïa ka kaba jop. Ngi la ïaid shaphrang na kawei ka takma ksiar ha u snem 2018 ha ka Athletics sha ka 15 tylli ki takma ksiar ha ka Athletics mynta u snem ryngkat bad ka jingjop ha kiwei pat ki jingïalehkai,” ong u Myntri Rangbah.
U Myntri Rangbah u la ong ruh ba wat hapdeng ka khlam COVID, ka sorkar ka dang ïai bteng ban kyrshan ïa ki nongïalehkai, da kaba pynthikna ba kin ïoh ïa baroh ki lad kiba bha tam, ka jingai jinghikai bad ka lad.
“Ka sorkar bad kiwei kiwei ki kynhun bapher bapher kiba kyrshan kiba ïatreilang da kawei ka jingthmu ban long ki lahduh, ban nga da sngewkmen shibun eh ha ka jingjop jong ki. Mynta ngi la long kiba la pynkhreh pura ban pdiang ïa ka lympung National Games ha u snem 2023 bad kiwei kiwei ki jingïalehkai ha ka pyrthei,” u la ong.
Ka Meghalaya ka la lah ban pynkut da ka jingioh khur haduh 36 tylli ki takma ksiar bad 149 tylli ki takma ha baroh ki jingialehkai.
Shuh shuh u Myntri Rangbah u la ong ruh, “Ka long kaba sngewdei ba ngan ai khublei nyngkong ïa ka Organising Committee, ki nongtrei, ki nongdie jingsiew, ki kynhun bad ki nongtrei mon sngewbha kiba la trei borbah ha kine ki taïew ban pynlong ïa kane kan lympung kaba jop.”
“La pynlong ïa ki lympung kiba kum kine na ka bynta ki nongïalehkai ba kin ïoh ïa ka rynsan, ba kin lah ban beh ïa ka thong jong ki ba kin long kiba tbit. Ngi dei ban ainguh ruh ïa ki coach, ki jingkyrshan ban pynlong ïa ka lympung ka bajop.”
“Ngi ai khublei ruh ïa ka North East Olympic Association bad ka Meghalaya State Olympic Association, ha kaba baroh ar ki la trei shitom ban pynthikna ba la pynlong ïa kane ka lympung katkum ka rukom pynïaid ha ka pyrthei, bad la pynïaid ha ka jingïadei bajan bad ka tnad ïalehkai,” ong u Conrad.
U la ai ruh ka jingkhublei ïa ki Dorbar Shnong bad ka Meghalaya Grassroots Music Project na ka bynta ka jingpyrshang jong ki ban pdiang ïa ki nongwan bad ban pyni ïa ka Shillong kaba shongshit.
