Nongpoh, Naiwieng 17 : Ki nongïalam ka Nongpoh Sports and Cultural Association (NSCA) mynta ka sngi kila pyntip ba shen kin sa sdang noh ïaka lympung ïalehkai basketball bala tip kum ka NSCA Christmas Cup Basketball Tournament 2022 naduh ka 10 tarik Nohprah haduh 20 tarik Nohprah 2022 ha madan Basket Sajer bad kumjuh ha St. Paul’s Basketball Court.
Haba kren sha ki lad pathai khubor mynta ka sngi naka liang u Bah Mathew Makdoh kum u Working President haka jingdonlang ki dkhot ka Basketball Committee u la ong baka thong jong katei ka lympung ka long ban pynmih ïaka sap ïalehkai basketball naka them Ri-Bhoi namar ha katei ka lympung yn shah tang ki kynhun kiba dei na Ri-Bhoi District.
La pyntip ruh ba ka tarik ba khatduh ban pynpoi ïaki form kan long shuwa lane ka 5 tarik Nohprah bad kan don ruh ka khusnam pisa sha ki nongjop bad ïaki form lah ban ioh na ophis u Rangbah Shnong ka Nongpoh Proper.
Kumta naka liang ka NSCA ka khot bad wer ïaki kynhun bad ki club bapher bapher na Ri-Bhoi district ba kin wan ban shim bynta ha katei ka lympung khnang ba katei ka lympung kan long kaba ïaid beit ïaid ryntih.
