Ka North East Olympic Games kaba ar kaba dang shu dep kut ha Meghalaya, lehse ka long ka lympung ïalehkai kaba biang tam na ka bynta ki Samla kiba dang khie dang san ha ki jait jingïalehkai Sports bapher bapher. Ha kajuh ka por kane ka lympung ka pyni ruh haduh katno ka Meghalaya, kum kawei ka ki jylla kaba ieit Sport bha, ka la lah ban pyni sha kane ka thaiñ Shatei Lammihngi ban pdiang ïa ki lympung jingïalehkai kiba kum kine.
Ha kane ka Lympung, palat lai hajar ngut ki nongïalehkai na ki phra tylli ki jylla ki la wan ïashim bynta ha ki 18 tylli ki jait jingïalehkai. Kane kadei ka sien kaba nyngkong ba ka jylla kan pdiang ïa ka lympung ïalehkai kaba kat kane. Ñiuma ha ki snem kiba ladep ruh ka la pdiang lang bad ka Assam ïa ka South Asian Federation Games, tangba ka la ïoh lad ban pdiang tang khyndiat tylli ki jait jingïalehkai. Kane ka lympung NEOG, ka la wan ruh ha ka por ba ka Meghalaya ka dang thmu ban pdiang ïa ka National Games jong ka ri India.
Ym lah ban len ba dang ha une u snem ka jylla ka la mad ïa ka jinglehraiñ ha ka por ba pynlong ïa ka Meghalaya Games, ha kaba ki la mih bun kiei kiei ki bym sngewtynnad khamtam ïa ki nongïalehkai kiba la hap ban sah ha ki kamra ki bym biang bad kiba jaboh. Hynrei ha ka NEOG, baroh ki la kylla lut namar kumba la pynpaw da ki nongïalehkai kiba na kiwei pat ki jylla, ba ki jaka sah ki long kiba biang, ka bam ka dih ruh ka long kaba biang bad ka rukom pynïaid ha man la ki jaka ïalehkai ka long kaba biang.
Halor kane ka jingjop ne ka jingïaid beit ka NEOG kaba ar, ka sorkar jylla kadei ban ïoh ïa ka burom, namar baroh kawei kane ka lympung la peit da ka sorkar lyngba ka Meghalaya State Olympic Association da ka jingïatreilang bad ki Sports Association bapher bapher ha ka jylla. Hynrei ym dei tang ka sorkar kaba dei ban ïoh burom, namar ba ki don da ki spah ngut ki Volunteer kiba la trei shitom miet la bad sngi ban pynlong ïa kane ka lympung ïalehkai kaba jop bad kaba ïaid beit ïaid ryntih.
Kane ka pyni hi ba ka jylla kam duna shuh ban pdiang ïa ki jingïalehkai kiba kum kine haba ïanujor bad kiwei pat ki jylla jong ka ri India. Ka sngi plie ne ka opening ceremony, ka la ïoh ïa ka jingïaroh na kiba bun, namar ka rukom pynphuh pynphieng bad kumjuh ruh ka sngi kaba pynkut ka long kaba pynhun ïa u paidbah.
Nalor kine, ka jinglehkai bha jong ka jylla ha kiba bun ki jait jingïalehkai kadei kaba ki paidbah kin sngew sarong. Ka Meghalaya ka la wan ba saw ha ka liang ka jingïoh Medal, ha kaba ka la jip 36 tylli ki takma ksiar, 35 tylli ki takma rupa bad 78 tylli ki takma rnong. Kane ka jingjopka la kiew bun shah na kaei kaba ka Meghalaya ka la jop na ka NEOG kaba nyngkong kaba la long ha Manipur. Wat lada ka Meghalaya ka la wan ha ka kyrdan ba saw,pynban ha ka Athletics ka la ïoh rah ïa ka nam lahduh.
Kane ka jingjop la ka long ha kaba pynlong bad pynïaid ne ha ka jinglah ban ïalehkai bad jop takma kadei ban ai mynsiem shuh shuh khamtam ïa kito kiba don bynta ha ki kam ïalehkai Sport bapher bapher. Kadei ban ai mynsiem ruh ïa kiba don ha ka sorkar ban nang pynbha shuh shuh bad khamtam eh kaba pynshlur ïa ki samla kiba don ka sap ha ki jingïalehkai Sport.
Kaba kongsan eh na kine baroh ka long ka jingtreikam kaba khuid khamtam eh ha ka jingpynlut pynsep na ka bynta kane ka lympung ïalehkai. Ki paidbah kim kwah ban ïohi ba hadien kane ka burom ba ka jylla ka la ïoh yn tap ne pynjngut noh pat ha kaba ïadei bad ka rukom pyllut na ka bynta ka NEOG kaba ar. Ai ba kito baroh kiba don bynta ha ka liang ka jingpynlut pynsep ba kim dei ban kwah tang ban ïoh kamai na kane ka lympung, hynrei ban pyrkhat pat na ka bynta ka jingkyntiew ïa ka Sport ha ka jylla.
