Yn pynïalehkai ka Meghalaya da tang ki player napoh Jylla ha ka Ranji Trophy 2023-24

Shillong, Kyllalyngkot 04: Ka long ka rai ka jwat bad ka ban sah kynmar ïa ka jylla, ha kaba ka synjuk Meghalaya Cricket Association (MCA) ka la pynbna ba kan nym khot ïa ki rangïalehkai kiba na bar (guest professional player) na ka bynta ka samoi 2023-24 jong ka lympung Ranji Trophy, hynrei ka la jied pat ban ailad bad ban sei madan baroh da la ki jong ki player ban mihkhmat ïa ka jylla ha kane ka lympung.
Kumban shu pynkynmaw, ka Meghalaya ka la ïoh ka jingshakri na lai ngut ki player ba ka la soi kiba na bar ban don bynta bad ka kynhun ha ka Syed Mushtaq Ali Trophy T20 tournament bad ruh ha ka Vijay Hazare Trophy one day tournament – kiba kynthup ïa u Rajesh Bishnoi, Tanmay Mishra bad u Nakul Verma – hynrei watla ki la long ka bynta ba kongsan ïa ka kynhun, hynrei pynban ka dei pat ka jingangnud kaba la slem ïa ka MCA ban sei madan da la ki jong ki rangïalehkai ka jylla bad lyngba kane kan plielad ïa ki ban kiew kham shaphrang ha ka kriket.
Kan long ruh ka burom bad ka jingsngewsarong ïa ka jylla ban sakhi ba baroh ki player ban mihkhmat ki dei hi jong ka jylla, hynrei kan long ruh ka jingïakhun kaba jwat ïa ka Meghalaya ha kajuh ka por ka lad ïa ki player ban pynpaw pyrthei ïa ka sap bad ïa ka jingtbit kaba ki don lyngba kane ka lympung.
Ka Meghalaya ka la shah pyn-ngatlang ha kajuh ka thup ryngkat bad ka Hyderabad, Nagaland, Mizoram , Sikkim bad ka Arunachal Pradesh. La pyntip ba ka Meghalaya kan sdang ïa ka jingïakhun kaba nyngkong pyrshah ïa ka Arunachal Pradesh bad la khreh ban pynlong ha Anand, Gujarat, naduh mynta ka sngi.
Ka kynhun jong ki15-ngut ki rang ban ïalehkai yn ïalam da u Bah Kishan Lyngdoh kum u Kapten. La aiti ha u Akash Kumar Choudhary ban shimti ïa ka kamram kum u symbud kapten hynrei na ka daw jong ka jingmynsaw u la hap ban duh mih madan ha katei ka jingïakhun kaba sdang mynta ka sngi, bad ha ka jaka jong u la bujli noh da u Chengkam Sangma.
Ka kyrteng jong ki player ban mih madan ïa ka Meghalaya ha kane ka lympung ki long: Arbin Singh, Arien Bonchang Sangma, Bamanbha Shangpliang, Bijon Dey, Dippu Ch Sangma, Jaskirat Singh Sachdeva, Kishan Lyngdoh, Lerry G Sangma, Md Nafees Siddique, Ram Gurung, Raj Biswa, Swarajeet Das, Sanvert Kurkalang, Tarique Siddique
Support staff: Goutam Shome (head coach), Moisten Ch Marak (assistant coach), Surojit Biswas (physio), Vikash Singh Chauhan (trainer), Dister Marbaniang (manager)
Ka prokram ïakhun jong ka Meghalaya ki long:
vs Arunachal Pradesh, naduh 5 tarik Kyllalyngkot
vs Hyderabad, naduh 12 tarik Kyllalyngkot
vs Nagaland, naduh 19 tarik Kyllalyngkot
vs Mizoram, naduh 26 tarik Kyllalyngkot
vs Sikkim, naduh 2 tarik Rymphang.