Shillong, Kyllalyngkot 04: Kum shi bynta ban pynkhlaiñ shuh shuh ïa ka kynhun, ka Shillong Lajong FC ka la shim da ka lynti da kaba soi ïa arngut ki player bynta ba shakhmat kiba kynthup ïa u Denzil Kharshandi u samla ïalehkai na ka jylla bad u Douglas Rosa Tardin tynrai nong Brazil.
Ka jingthmu jong ka kynhun da kaba wanrah ïa kine ki arngut sha ka klob ka long ban pynkhlaiñbor shuh shuh ïa ki bynta ba shakhmat na bynta ki jingïakhun ba dang sah jong ka samoi 2023-24 ka lympung I-League.
Khyndiat haba phai sha u Douglas Tardin u la sdang ban ïalehkai na Brazil, bad u la mih madan ruh na ki kynhun kiba na Switzerland & Angola. U la mih madan ruh na ki klob kiba na ka thaiñ South East Asia kum ka Quang Nam, Saraburi United bad ka Suphanburi ha ki snem ba ladep.
Katba u Denzil Kharshandi – u dei u rangïalehkai ba la ïoh jingshah pyntbit ha ka DSK Shivajians, u la mihkhmat ruh ïa ki klob kum ka Punjab FC, ARA FC bad ka Mohammedan SC ha ki snem ba ladep.
Ka jingwan ïasoh u Denzil Kharshandi kan sa nang pynshongshit shuh shuh ïa u paid nongkyrshan ka Lajong kiba ju ieid bad sngewtynnat ban peit ïa ka sap ïalehkai ki samla ka jylla, khamtam ha kane ka samoi na ka liang jong ka kynhun ka don ïa shibun ki player khasi.
Haba phai sha ka kynhun, hadien ba ka la kiew biang sha ka lympung lehkai I-League, ka Shillong Lajong ka la nang pynskhem ïalade ha ka kyrdan ba san lyngba ki 19 point ba ka la khur na ki jingïakhun ba ladep hapoh ka jingïalam u Bah Bobby Nongbet kum u manager.
Nalor ka I-League ka kynhun ka phaikhmat ruh ban aireng ha ka Kalinga Super Cup ha Bhubaneswar mynta u Kyllalyngkot, bad la khmihlynti ïa ka Lajong ba kan ïalehkai bha ha katei ka lympung.
