Ka aïom tyrkhong ka la poi, ha kaba ka lyer rkhiang ka la beh kyrthep, khamtam ha kine ki khyndiat sngi. Kine kidei ki por ha kaba ka wan ruh ka jingtyrkhong um ne ka jingkyrduh um, namar ka jingrngad noh jong ki pung, ka jingduna um ki tyllong um. Kane kadei ka por ba ki paidbah kin hap ban kynmaw ban tyngkai ïa ki tyllong um, la ki long ki tyllong um dih, ne ki tyllong um ban sait ban khlieng. Ïa ka Meghalaya la ker tawiar da ki khlaw ki btap ba rben bad ba jyrngam bad lyngba jong ki, ju kyrsoi pat ki umpohliew kiba da bang bad shngiam pat haba dih ïa ki. Ka jingkyrsoi jong ki umpohliew, ym tang ba ka lah ban pyndap ïa ka jingdonkam jonng u briew, pynban kaba tam ka da kyrsoi shisha haduh katta katta kaba lah pat ban ring nur pat ïa ki ban tan sha ki lyngkha naka bynta ban ïoh pat ban rep ban riang.
Haba baroh ki saw aïom jong ka snem, lait noh tang ha ka aïom pyrem, haba ka bneng ka sdang ban ring tyrkhong bad ap ïa ka jingwan ka aïom lyiur, ba ki umpohliew ki rit bad ki rngat, hynrei ki ïai long pat kiba la pynkhreh ba kin shim ïala ka kamram ban pyndap ïa ka jingdonkam ka jong u khun bynriew. Pynban ha ka juk ïa beh ïa ka spah ka jingbeh than eh ïa ka jingsuk pyrthei ka pynlong ïa ka mynsiem u khun bynriew ba un khynra hi war ïa kiba bun ki tyllong um, ha kaba sdang eh, u pynjot ïa ki khlaw ki btab, u dain u khrai ïa ki dieng ki siej, u da dusmon da tyngeh ïa ki kynbat dawai, haba um sngew ïohnong na ka khlaw, u hiar sha ki jaka ba kham them haba ka um ka lang, hangne u pyndonkam da ki kor ki bor ba khlain ban sam lyngba ïa ka khyndew, namar ka jingkwah rhah palat ka jong u ïa ka um kaba un bam, hynrei ïa kaba tam u da pynkylla dur pat ïa ka sha ka lad ban kamai ja kamai dohkha, da kaba die pat ïa ka um.
Ym tang katta, ka mynsiem bam duh bym don ka jingpyrkhat ïa ka lawei ka ïai rung ha ka mynsiem u bynriew, da kaba u da thang dusom ïa ka khlaw ki btap ïa ki dieng siej, kiba da kylla, katta ka um kaba jiar na ki, ki sdang ban ring tyrkhong bad ruh ha ka juh ka por ba kin jah rngai noh. Haba phai sha ki tyllong um ba kyrsoi ha ki wahduid bad ki wah bah, u bynriew u sdang ban pynjot da kaba tih maw tih shyiap, u da khynra naphang ïa ki jaka ba don ki tyllong um, da kaba u da pynduh pyndam ïa ki, namar na kum kane ka jaka, u da sngewkmen palat ka mynsiem namar ba u ïoh ïa ka kabu ban kamai spah kamai phew.
Kumta, katba nang mih ki sngi, kiba bun ki tyllong um ba kyrsoi ha kane ka jylla ki sdang ban duh jait, ha kaba ka umpohliew bah ba ïai kyrsoi ha ki saw aïom jong ka por, mynta ki la sdang ba kin jah, hynrei shu sah shisha satang ki dienjat jong ka jingtuid ka um, kaba da kylla ki long pynban kum ki ummat jingtim ïa ka jingleh hanga mei palat ka jong u khun bynriew.
Mynta la donkam kyrkieh ban pynkyndit bynriew ïa u paidbah, ba ka por ka la dei shisha ban sdang ha kaban tyngkai lut ïa man la ki tyllong um kiba don ha kane ka jylla, ha kaba man la ki shnong ki thaw, ki dong ki kyntoit ban shim khia naka bynta ban pynneh ïa ki tyllong um kiba kyrsoi na ki. Lymda kloi lan ban shim khia katba dang biang ka por, ka por kan sa poi ba kan sa khie ka kynja kyrduh um kaba shyrkhei, katno tam lei lei ha kum kane ka aïom tyrkhong kaba ka bneng ka rang tyrkhong bha, ba sdang pat ka kdew kti ne thnum namar balei, ka daw baroh ka long namar ka jingbym shim ïa don lem ïa katta ka mynsiemban ïa bah khlieh. Shuh shuh ka por ka la dei ruh ba ka sorkar ba kan khang noh shi syndon ïa ka jingsdang ban bteng ban sam um pathar shapoh ka khyndew, namar ba kane kam ktah tang ïa ka jingpynrngat ïa ki tyllong um, pynban ka jingma ka long ïa ka jingpei thliew ka sla khyndew, kaba tang shu khie pat u jumai lah ban lam pynban sha ka jingma, namar ba ka khyndew ka la long lypa kaba la tor.
Lymda kloi ba teh lakam ïa kane ka jingpynjot ïa ki tyllong um, sa shisien dei biang u paidbah hi uban mad ïa ka jingeh, ha kaba un shem bad ïohi ïa ka um ha baroh sawdong ba ker ïa u, hynrei wat tang shi jaw ruh pat un nym ïoh pat ban dih ïa ka, namar ba ka um kaba kyrsoi,kadei kaba long bih naka jingleh dusmon jongno re.
