Shillong, K’Lyngkot, 10: Ki nongrep kwai bad ki nongrep synsar ha ka jylla mynta kim donkam shuh ban khuslai hadien ba ka Kynhun Myntri ka la rai ban pyntreikam noh ïa ka sienjam ba thymmai kaba tip kum ka CM – Assure kaban peit ïa ka iew jong kitei ki mar rep lada jia ba ka dor ka hiar palat.
Ïa kane ka rai ka kynhun Myntri ka la shim ha ka jingïalang kaba nyngkong kaba la pynlong ha Sohra ha kane ka sngi Thohdieng.
Haba kren bad ki lad pathai khubor u Myntri Rangbah ka Jylla Conrad K Sangma u la ïathuh ba lyngba kane ka CM – Assure ka thong ka long ban peit na bynta ki mar rep bym pyut kum u kwai bad synsar khnang ba ki nongrep kin ym shah ktah lada jia ba ka dor iew jong ki ka hiar. Na bynta kane ka prokram, u Myntri Rangbah u la pyntip ba ka sorkar ka la mang ïa ka corpus fund kaba 100 klur tyngka bad 20 klur pat na ka sorkar pdeng.
“Kumba long mynta ka dor jong u synsar bad u kwai ka hiar bha bad kumta la sngewdonkam ïa ka sorkar jylla ban tuklar lang na bynta ka jingeh jong ki ha kum kane ka por.”
La ïathuh ruh ba hapoh kane ka CM – Assure, ka sorkar jylla lyngba ka marketing board kan thied hi ïa kine ki mar rep lada jia ba ka dor jong ki ka hiar bad kan sa die kylla pat ïa ki hadien. U ong ruh ba lyngba kane ka sienjam kan ïarap ïa ki nongrep ba kin ym mad than ïa ka jingdukha mynsiem haba ka dor ki mar rep ka hiar.
Shuh shuh u ong ruh ba kane ka rukom treikam kan ïai bteng bad kan ïai tyllun man ka por bad la khmih lynti ba kane ka sienjam kan long ka jingïarap kaba khraw ïa ki nongrep ba kin ym donkam ban die tad dor ïa ki mar rep jong ki ha ka por ba sniew iew.
