Shillong, Rymphang 10: Ka United Democratic Party (UDP), kaba dei ka dkhot ba ïatreilang hapoh ka sorkar Meghalaya Democratic Alliance (MDA), kan wad ka jingpynshai na ki paralok ba ïatreilang bad ka halor kiba bun ki kaiphod khaïi bad kit dewïong beaiñ kaba la jia ha ka jylla.
“Kine kidei ki jingshah kynnoh kiba shyrkhei bad ngi donkam ban don ka jingïasyllok kaba biang shaphang kine,” ong u nongïalam ba la kham rim ka UDP bad uba dei ruh u Myntri hapoh kane ka sorkar u Bah Paul Lyngdoh.
Ki la don bun ki kaiphod ka jingïaibteng ka kam khaïi bad tih dewïong beaiñ kiba la paw ha kine ki sngi, da ka jingthung ka Ïingbishar ïa ka committee, ba la khlieh da u retired Justice BP Katakey, la shem ba ki don ki sakhi ïa kine ki kam ha South Garo Hills.
U Bah Lyngdoh, u ba la dei ruh u nongaiktien hapoh ka sorkar MDA u la ong, “Khlem pep ngin ïakren ïa kane ka kam bad ki paralok ba ïatreilang bad kumjuh ruh hapoh ka MDA, naba ki don bun ki kaiphod ki bym shai ba ngi donkam ban pynshai.”
Kham ha shwa u Justice Katakey u la pynpaw ba ki jingtohkit halor ki 7 tylli ki jingujor ba don ka kam tih dewïong beaiñ ka la ïaid shakhmat. La sam ruh ïa ki jingpynbna sha baroh ki briew kiba donkti, watla uwei u briew u khlem wan sha ka sngi ba la buh ban pynlong ka jingbishar ha Guwahati, ba la pynbeit na ka bynta ka bit ka biang jong ki.
