Yn nym iehnoh ïa ki paralok ba ïatreilang ha ka MDA watla ngi la kot 32 ngut ruh: Prestone

Shillong, Naiwieng 24 : Haba kren halor ka jingjop ka Dr Mehtab Chandee, u Bah Prestone Tynsong, Symbud Myntri Rangbah ka Jylla bad State President ka NPP, u la ong ba ka jingjop na katei ka Constituency ka pynïoh ïa ka jingbun MLA kaba skhem jong ka Party ha Ïing Dorbar Thawaiñ ka Jylla kata da 32 ngut. “ Tangba wat la ka party ka la kot 32 ngut ki MLA ruh kan ym iehnoh ïa ki paralok kiba ïatrei lang ha ka sorkar MDA baroh shi katta bad ka jingïatrei lang kan dang ïai bteng beit nangne shakhmat ruh” ong u Symbud Myntri Rangbah.
U la ong ba ka khana ka pynkynmaw biang sha u snem 1972 ha kaba ka APHLC ka ïoh 32 ngut ki MLA bad mynta pat da kane ka jingjop jongka Dr Chandee la ïoh da ka NPP 32 ngut ki MLA. U la ong ba ka jingdon 32 ngut ki MLA na ka Party kaba lam khmat ïa ka Sorkar MDA kata ka NPP kam mut pat ban iehnoh ïa kiwei ki Party kiba la ïa treilang naduh u snem 2018 haduh mynta.
Ha kawei pat ka liang u la ong ba ka jingjop ka NPP ïa ka elekshon shiteng samoi ha Gambegre ka dei namar ki paidbah ki kwah ïa ka roi ka par ha katei ka Constituency kaba la mih khmat da u Saleng A Sangma la saw sien kum u MLA ha shwa ba un resaiñ hadien ka jingshah jied kum u MP Lok na Tura Parliamentary.
Shuh shuh ki nongïalam ba ha khmat ka National People’s Party (NPP) ha ka janmiet 23 tarik u Naiwieng, 2024, ki la pynlong ka jinglehkmen bad shad kmen ha ophis treikam ka Party ha nongbah Shillong na ka bynta ka jingjop ka Dr Mehtab Chandee A Sangma, kyrtong ka Party ïa ka elekshon MLA shiteng samoi sha ka ïing Dorbar Thawaiñ ka Jylla na Gambegre Constituency.
Ha kane ka janmiet la sakhi ïa ka jingshim bynta lang ka Dr Mazel Ampareen Lyngdoh, MLA ka Shillong East kaba dei ka Myntri Sorkar, ki nongïalam ka Party ba kynthup ïa ka NPP Shillong Cit, Women’s Wing, ki nongïalam ka National People’s Youth Front (NPYF) lem kiwei pat.