Shillong, Naiwieng 24 : U Chief Secretary ka jylla u bah D.P Wahlang, IAS, u la ong ba ka jingkhang jongka sorkar ka dang plie beit ïa ka seng Hynniewtrep National Liberation Council (HNLC) ban wan sha ka miej jong ka jingkren ïasuk.
Kane ka jingkren jongu la long tang hadien katto katne sngi ba ka sorkar pdeng ka la pynjlan biang ban kheiñ beaiñ ïa ka seng HNLC da kaba pynngat ha ka kyndon aiñ Unlawful Activities (Prevention) Act 1967 (UAPA) sa san snem kynthi.
“ Ka jingkhang jong ngi ka dang ïai plie borabor na ka bynta ka seng HNLC bad wat haduh mynta ruh namar ha ka por ba ngi sdang ka jingkren ïasuk ruh ki la shah khein beaiñ hi bad haduh mynta ki dang dang dei ka seng beaiñ hi kumta kumba ka jingkhang ka plie ha kato ka por mynshwa kumta ruh ka dang plie wat haduh mynta ruh” ong u bah D.P Wahlang.
Dang shen lah ban pynkynmaw ba ka seng HNLC ka la kynnoh ba ka jingkhot kren ïasuk ka sorkar ka long tang ka jingpyrshang ban pyntroiñ ïa ka seng bad ban khang lad ïa ki nongrim ba ka seng ka ïeng ban ïaleh.
“ Ka jingkhot jongphi ban wan sha ka miej jingkren ïasuk kam dei kaei kaei ruh hynrei ka dei tang ka buit ban pyntroiñ ïa ki nongrim ba ngi ïeng ym dei satia na ka bynta ka jingmyntoi jongka jaidbynriew. Ka jingthmu ba sha lyndet ka dei beit ban pyntlot, pyntroiñ, pynduh mynsiem, ban ïoh phrung ban pharia bad pyntroiñ ïa ka jingïaleh jong ngi da kaba leh mynleh ban wad ïa ka jingsuk.Kane kam dei ka jingshim khia ban wad jingsuk hynrei tang ban ïuhroit bad pyntroiñ ïa ka nongrim ba ngi ïeng ban ïaleh” ong u General Secretary uba dei ruh u Publicity Secretary ka seng HNLC u bah Sainkupar Nongtraw ha ka kyrwoh khubor ba la pyllait ha ka 15 tarik Naiwieng 2024.
U bah Nongtraw u la ong ruh ba ka seng kam don jingsngewpher sngewphylla hi halor ka rai jongka sonkar pdeng ban pynjlan biang ka jingñiew beaiñ ïa ka seng da kaba pynngat ha ka kyndon aiñ unlawful Activities (Prevention) Act 1967. “Kane ka jingñiew beaiñ biang ka dei ka jingthombor bad ïuhroit ïa ka nongrim ba ngi ïeng ïaleh ban syngit ïa ka thong ba ngi ïeng ban ïada ïa ka ri bad ka jaidbynriew” ong biang u bah Nongtraw.
Une u nongïalam ka seng HNLC u la ong shuh shuh ki buit poh ka tnad kam pohïing jongka sorkar ban ong ba ka seng HNLC ka la dei tang ka kynhun rit kaba don sa tang kumba 10-15 ngut ki dkhot ka pynpaw ïa ka jingñiew poh ïa ka bor jingkhlaiñ jongka seng. Hynrei ka jingai jingkheiñ jongphi hi ka pynpaw ba kane ka dei ka jingïalam bakla jongphi ïa ki paidbah namar tang ki dkhot ka seng kiba la shah kem ruh ki don haduh 73 ngut bad ka jingbun paid jongka seng ka dang ïai kiew na ka por sha ka por.
Shuh shuh ka jingshisha ba ki don tang lai ngut ki dkhot ka seng HNLC kiba la wan pyndem ha kine ki san snem ka pynpaw ïa ka dak jong ka jingkhie im bad jingïaishah bad aiti lut ki dkhot sha ka nongrim jongka jingïaleh. Kane ka pynpaw ruh ïa ka jingskhem nongrim jong ki samla kiba ïohi ba dei tang ka jingkieng atiar kaba dei ka lynti ban ïeng ïaleh pyrshah ïa ka jingthom bor jognka sorkar India.
Ka jingkheiñ beaiñ jongka sorkar pdeng ïa ka HNLC sa san snem lynter ha ka kyndon UAPA 1967 ka dei hadien shiphew bnai ba ka seng ka la kynran dien noh na ka miej jingkren ïasuk. Ka HNLC ka la weng noh na ka miej jingkren ïasuk ha ka 3 tarik Kyllalyngkot 2024 da kaba kynnoh ba ka sorkar ka khlem shimkhia ïa ka jingkren ïasuk.
