Shillong, Naiwieng 24 : Ka Myntri ka tnad ka Koit ka Khiah ka Jylla, Dr. M Ampareen Lyngdoh ka la ong ba ki sngewkmen haduh katta katta ba ka jylla mynta ka la ïoh sa kawei pat ka longkmie kum ka nongmihkhmat paidbah ha Ïing Dorbar Thawaiñ ka Jylla.
Kane ka jingong jong ka Myntri kaba dei ruh ka MLA jong ka NPP na Shillong East, kadei hadien ba ka kyrtong ka NPP, ka Dr. Mehtab Chandee A Sangma ka la shah jied kum ka MLA ba thymmai jong ka Gambegre ha ka elekshon shiteng samoi.
“Ka Dr. Mehtab Chandee ka long ka briew kaba stad bad ka briew kaba jai jai, ka briew kaba kloi ban ïarap ïa kiwei. Nga la ithuh ïa ka la ka katto katne bad nga sngewkmen ba u Blei u la sei sa kawei ka longkmie na ka bynta ka Gambegre bad khamtam na bynta ki nongshong shnong jong ka rilum Garo baroh kawei,” ong ka Myntri.
Ka Dr. Ampareen ka ong ruh ba ki ngeit skhem ba kane ka longkmie kan long kawei na ki atiar kaban ïarap bad tynrong lang ïa kiba bun ki kam kiba ïadei bad ka aiñ ki kanun jong ka saiñpyrthei ha ka jylla.
“Nga sngewkmen shisha ba ngi ïoh sa ïa ka Dr. Chandee khamtam ha kum kane ka por ba ngi duna bha ki longkmie hapoh ka Ïing Dorbar Thawaiñ ka Jylla,” la bynrap biang ka Dr. Ampareen.
Mynta ka samoi, ka Ïing Dorbar Thawain ka Jylla ka la don haduh saw ngut ki longkmie kiba long MLA, kata ka MLA jong ka Shillong East, Dr. Ampareen Lyngdoh kaba dei ruh ka Myntri Sorkar ka jylla, nangta ka MLA jong ka Sutnga Saipung ka Santa Mary Shylla, ka Miani D Shira na Ampati bad mynta sa ka Dr. Mehtab Chandee Sangma. Lai ngut na kine ki dei na ka NPP katba ka Miani pat ka jop na ka TMC.
