Shillong, Naiwieng, 24: Ha ka miet sngi Saitjaiñ baroh shi miet ki nongdie madan na kylleng ki shnong bad ki jaka jong ka sor Shillong ki la ïalum lang ban synran ïa ki para nongdie madan ha Khyndai Lad kiba khlem khang shuh ïa ka jingdie ïa mar jong ki kum ka dak bad ka jingïakhih ban pyrshah jur ïa ka jingpyndik, jingpyntieng pynsmiej jong ki bor Sorkar kiba ïai byrngem ban weng be-aiñ bad kyndang jubor ïa ki.
Ka jingshong die jingdie baroh shimiet ka long kum ka dak ban pyrshah jur ïa ka jingkren thawnang bad jingïalam bakla jong u Myntri ka Sorkar Jylla u Bah Paul Lyngdoh u ba byrngem ban weng bad kyndang be-aiñ ïa baroh ki nongdie madan ka ban sdang naduh ka sngi u Blei ka 24 tarik mynta u bnai.
Hapdeng ka jingkhriat tasam jong ka miet tlang ki nongdie madan ha Khyndai Lad ki la shong sahmiet ha ki jaka die jingdie jong ki ban ieng ïakhun ïa ka hok kamai jong ki bad ban ïada ïa ka Aiñ kaba ïada bad kyntiew ïa ka kamai ja kpoh jong ki. Ki Nongdie madan ki ieng ban ïakhun na ka bynta ki khun ki kti ban bsa bad pynnang pynstad ïa ki.
U Seneral Secretary jong ka MGSPHSVA Bah Shane Thabah ha u kyrwoh ba la phah sha ki lad pathai khubor u la ong ba kane ka jingsah miet ha ki jaka ba ki nongdie madan ki shong die jingdie ka dei ka jingïakhih kaba don burom tam.
“Ka dei ka jingïakhih ka ban pynkynmaw ïa ka Sorkar ba ka dei ban pyntreikam hok bad ïa iwei pa iwei i kyndon jong ka Aiñ, The Street Vendors ( Protection of Livelihood and Regulation of Street Vending) Act 2014 kaba dei ka Aiñ kaba ïada bad kyntiew ïa ka kamai jakpoh jong ki nongdie madan,” u la ong.
Ka seng ki nongdie madan ka pyntip ruh ba kino kino ki jingtei ne iing shong dukan kiba thymmai kiba la tei da ka Sorkar, kum ka Shopping Mall ha MTC, Mariot Hotel, Vivanta Hotel, Polo Market, Laitumkhrah Shopping Complex dei ban mang kyrpang kumba 20 % ki kamra dukan na ka bynta ki nongdie madan ba kin lah ban die jingdie.
U la ong ba ki don beit ki jaka ha kaba ki nongrwai nongput nongtem ki lah ban pyni ïa ki sap jong ki bad ban pynbyrngia ïa ki briew, ka Seng ki nongdie madan bad ki nongdie madan ki pdiang sngewbha ïa kiba kin wan ban tem sur bad kynud jingrwai ha ki jaka ba ki shong die jingdie.
“Wat i Bah Paul Lyngdoh ruh lada i kwah ban rwai ne pule ïa ki poitri jong i, ma ngi ki nongdie madan ngi kloi ban ïarap ban pynkhreh bad pynlong ïa ki tamasa ba kyrpang na ka bynta jong i ha madan,” la bynrap u kyrwoh.
