SHILLONG, Nailur 25: Ka Meghalaya Athletics Association ka la jied ïa ar ngut ki nongïalehkai (athlete) ban mihkhmat ïa ka jylla Meghalaya ha ka 4th Indian Open U-23 Athletics Championship 2024. Kane ka Championship kaba lai sngi lynter kan long ha Patna-Bihar, naduh ka 28 tarik haduh 30 tarik Nailur, 2024.
Kine arngut ki kynthup ïa u Samla Kyrshanlang Shylla u ba la shah jied ban shimbynta ha ka jingmareh kaba 400 Mitar. U Kyrshanlang u dang 20 snem na ka shnong Kyndong Tuber, West Jaintia Hills District, bad u dei u ba la shah pyntbit ha SAI, STC Shillong.
Katba u wei pat u dei u Samla Renaldi Dhar, 18 snem, na ka shnong Wahiajer, West Jaintia Hills District, u ban shimbynta ha ka ïakop mareh ba 100 Mitar ha katei ka championship. U Renaldi u dei u khynnah u ba la shah jied bad shah pyntbit lyngba ka Super Elite Pathway Program, Shillong.
Baroh ar ngut ki dei kiba la khur takma ha ka 3rd NorthEast Games 2024 kaba la long ha Nagaland, bad ki dei ruh kiba la khur takma ksiar ha ka 5th Meghalaya Games 2024 kaba long naduh sdang snem ha Tura.
Na ka liang jong ka Meghalaya Athletics Association ka kitbok kitrwiang ïa kine ki ar ngut ba kin ïalehkai bha.
