Nang kharoi ki kali ha Shillong, syrtok ki Pulit pynïaid kali

K i Pulit pynïaid kali jong ka Shillong Traffice Police (STP) wat ha i bor barit ki la pyrshang ban weng ïa ka jingdheng kali ha ka nongbah Shillong, hynrei kumba ka paw, ka jingkharoi ki kali ha ka nongbah ka la nang kiew nang kiew katba nang mih ki sngi.  Ka jingkharoi ki kali ka la pynsuhsat ym tang ïa ka tnat Pulit hynrei wat ïa ki paidbah nongïaid nongieng kiba ïakynduh mawsiang ha ka leit ka wan namar ka surok ka sah hi kumjuh naduh ba la pynkha ïa ka Jylla Meghalaya na ka Assam.

Ka jingkharoi jong ki kali saw shaka bad ar shaka ha nongbah Shillong ka long kaba la ishyrkhei haduh katta katta namarba manla ka sngi ki paidbah ki thied kali bad ki thied ïa ki thuk thuk ar shaka ban dup suk ka leit ka wan bad ka ïabeh kam ïabeh jam.

Haba peit ïa ka jingdheng kali ka dei na ka jingdon jong ki katto katne ki nongñiah kali kiba pynieng kat haba lap ba shem ïa ki kali katba ki sngew bit.  Ka jingpyntreikam jong ka Shillong Traffic Police ïa u “Khnap” (Clamp) kam pynpei skhor ïa ki nongñiah kali namar ki pynieng ïa kali wat ha ki jaka ba la thoh “No Parking,’ kaba wanrah pat ïa ka jingsuhsat jong ki nongñiah kali kiba bud ïa ki kyndon aiñ niah kali bad ïa ki nongïaid nongieng.  Ka jingbym biang ki lynti ïaid kjat ka buh jingma haduh katta katta ïa ki nongïaid lynti namar ki don ki khep ha kaba ki paidbah ki hap ban ïa synrud lang bad ki kali.

Ka jinglong amriang jong ki nongñiah kali kiba pyrkhat tang ïa ka malade ka wanrah ïa ka syrtok ïa kiba bun.  Ka daw kam dei namarba kim tip ïa ki kyndon aiñ niah kali hynrei ka dei tang namar ka jingsngew baheh.  Ka tnat Pulit watla ka la pynshitom ïa ki nongpynkheiñ da kaba shaiñ kuna bad da kaba pyndait da u Khnap pynban ki paidbah ki dang ïai leh saitlah ïa ki jingmaham bad jingmana jong ka tnat Pulit.

Ka jingailad ban pynieng ïa ki kali shilynter ka surok ka dei kawei na ki daw bah kaba ju wanrah ïa ka dheng kali namar ki don beit ki riewshimkabu ki ban phrung ban pynieng ïa ki kali wat haba ki la ïohi pylleiñ pylleiñ ba wat jaka pynieng kali ruh kam don shuh.  Tangba biang ka malade shimet, kam pher watla kiwei ki suhsat ne ki khñium.

Ha Khyndai Lad ka jingailad ïa ki taksi kamai ban pynieng katba mon ha ka surok Keating Road ban mih sha Khyndai Lad ka dei ka dawbah kaba wanrah ïa ka jingkhapngiah.  Ka jingailad ïa ki Bos Saw ban ieng sahuh ha Khyndai Lad ka dei kawei na ki daw kaba ju wanrah bha ïa ka jingdheng kali. Ha Motphran, ka jingailad ïa ki Bos Saw ban leh mon bad leh trai kat haduh ban pynlong kum ka Parking Lot hapdeng surok ki dei ki dawbah kaba wanrah ïa ka jingdheng kali kaba jur bha ha ka surok Guwahati-Shillong Road.  Ïa kane lah ban sakhi khamtam ha ka por janmiet, ha kaba ki kali Bos Saw ki ïaid kum ki mattah ban thep pyndap da ki nongshong kali khlem pyrwa la ka surok ka don hapdeng ka jingdheng kali.  Nalorkata, sa ka jingdon ki nongdie madan hapdeng surok ka la pynwit shuh shuh ïa kane ka surok ha ka thaiñ Motphran kaba long ka kad khaii kaba ju thnem bha da ki nongleit nongwan bad ki nongthied nongpet baroh shingi.

Ha Laitumkhrah, ka daw na ki jingdheng kali ka dei namar ba ka long ka jaka pdeng jong ka shlem Pule Puthi jong ka sor Shillong bad ka Jylla Meghalaya, ha kaba baroh kiba na Sor bad ki shnong Khapsor ki ïabeh ban phah skul sha ki skul kiba don ha Laitumkhrah.  Da ki phew hajar tylli ki kali kiba tyllun ha ki surok ka Laitumkhrah ha ka shi sngi nalor kata, sa ki kali kiba wan na Jowai. Ka jingwanrah jong ka Sorkar da ki Bos STEM ban kit ïa ki khynnah ha ka por long skul bad ha ka por ba la wai skul kam shym la duna ïa ka jingdon kali ha surok hynrei ka la nang pyndheng shuh shuh ïa ki kali ha ka thain Laitumkhrah namar da ki hajar tylli ki kali saw shaka bad ar shaka ki ïaid ha kajuh ka por tang ha i jylli iba rit ha ka shnong Laitumkhrah.

Kane ka dei ka daw kaba la idonkam haduh katta katta ba ki bor pynïaid skul ki la dei ban pyrkhat thymmmai ban weng ïa une u sohkyrdot da kaba buh noh da ki School Bos hynrei kane kam shym la sei soh na kiba bun ki daw.

Nalorkata, la sngewdei shisha ba ka Sorkar ka la dei ban tei noh da ki Rural Market khnang ban pynduna ïa ka jingwan tur ki briew na ki khap Sor Shillong khnang ban weng ïa ka jingdheng kali ha Sor.  Ynnai ïakren ïa ka jingdheng kali ha Them Iew Mawlong kaba dei ka kad khaii kaba ju thnem da ki paidbah kiba wan na kylleng ki shnong nongkyndong ban wan siew wan tda bad wan donkam manla ka sngi sha Sor Shillong.

Ka ladei ka por ba ka Sorkar Jylla kan hap ban pyrkhat thymmai ban pynïar ïa ka Sor sha ka New Shillong kumba ka la thmu naduh ki snem kiba mynshwa namar katba nang mih ki bnai ka jingbunbriew ha ka sor ka la nang kiew artet.