SHILLONG, Nailur 25: Ka Umpling SC bad ka Tynring SC, ar tylli ki kynhun ba khadduh ban pynthikna rung Semi Final ha ka Third Division 2024 jong ka Shillong Sports Association hadien ba jop ha ki jingïakhun ha ka Sngi Balang (25 tarik Nailur, 2024) ha SSA Ground, Polo.
Ka Umpling SC ka la pynliem ïa ka Sanmer SC lyngba ka tie breaker, katba ka Tynring SC ka la pynliem da 3-1 kol ïa ka Mawkriah West SC.
Haba phai sha ka jingïakhun hapdeng ka Umpling bad ka Sanmer, haduh kaba kut jong ka por kine ki ar kynhun ki la ïoh ban thep mar 2 kol. U Adonay Riwan (73min) bad u Larrykupar Kharnaior (89min) ki la pynkhih ïa ki ar kol na ka Umpling. Katba ka Sanmer la thep da u Babitbor Dorphang (26) bad u Kenny Maxwell Syiem (87).
Watla ha ka jingïalehkai ka Umpling ka la shah lamkhmat baroh ar sien shuwa ba kan pynïakhaid hynrei ha ka tie breaker ka la lah ban jop 4 – 2 ïa ka Sanmer ban rung sha ka Semi Final.
Ha ka jingïakhun Quarter final ba khadduh, ka Tynring ka la pynkhyllem noh ïa ka Mawkriah West da 3-1 kol. Kine ki lai kol na ka Tynring la thep da u Bankitlang Kharkongor (4min), Jesleyroy M Pdah (38 min) bad na u Commanding Swer (43 min). Katba ka shi kol ïa ka Mawkriah West la thep da u Edrickson Warjri (87min).
Shuwa kane, ki ar tylli ki jingïakhun Quarter final ha ka Sngi Hat Majai (24.09.2024), ki ar kynhun ba jop ki long ka Mawryngkneng SC bad ka Mawpat SC.
Na ka liang jong ka Mawryngkneng SC ka la pynliem da ka said ïa ka Lumparing da tang shi kol, bad ïa kane ka kol la thep da u Iohbor Mukhim (67 min).
Katba ka Mawpat SC ka la pynliem ïa ka Kharang SC lyngba ka tie breaker hadien ba ïakhaid ha ka jingïalehkai. Baroh ar kynhun ki la ïoh ban pynkhih mar ar kol. Ki ar kol ka Mawpat la thep da u Kardinuis Kharbangar (38min) bad u Dikosta Nongrum (75min), katba ïa ka Kharang la thep da u Firstborn john Marwein (21min) bad u Riben G Talang (72min). Ha ka tie breaker ka Mawpat SC ka la jop da 4 – 2.
