SHILLONG, Nailur 25: Ha ka sien ba nyngkong u rangïakura ‘pro fessional boxing’ ka jylla- u Shanborlang Marbaniang un sa leit ban aireng ha rynsan ïakhun shabar ri (international fight) kaba la tip da ka ‘Rise of Champions’ ban long ha Bangkok-Thailand ha kane ka Sngi Balang (26 tarik Nailur, 2024).
Ha kane ka jingïakhun, u Samla Shanborlang – u rangïakura na ka thaiñ Upper Shillong, Laimer un sa hap ban ïatynjuhbor pyrshah ïa u Jayson Vayson, 24 snem, jong ka ri Philipines. Kane ka rynsan ïakura la pynlong da ka Highland Boxing Promotion, na Thailand, bad ka jingïakhun hapdeng u Shanborlang bad u Jayson Vayson kan long na bynta phra tylli ki kylla lane Round ha ka kyrdan ïakura ki Light Flyweight.
U Jayson Vayson (Philipines) u dei u rangïakura ba bat ïa ka rekod da 12 sien jop, shah rem shisien bad ïakhaid shisien, bad 6 tylli ki jingïakhun kidei kiba u la jop lyngba ka Knock Out, u bat ruh ïa ka kyrdan ba 18 ha ka pyrthei. Katba u Samla Shanborlang u la jop 5 sien, rem ar sien bad ïakhaid 2 sien. Ha kane ka rynsan ïakura ban long ha Thailand, u Shanborlang un sa mihkhmat ïa ka ri India na ka CSM Promotion, ka synjuk na Agra, Uttar Pradesh.
Watla kane ka dei ka sien ba nyngkong ïa u Samla Shanborlang ban mih ïakhun ha ki rynsan ïakura shabar ri hynrei na ka liang jong u, u khmihlynti ban khur ïa ka jingjop.
