Yn leit shong kyllaiñ myngor biang ka HANM sha Delhi halor ka ILP bad ktien Khasi, Garo

Shillong, Naiwieng 01: Ka Hynñiewtrep Achik National Movement (HANM) ha ka sngi Thohdieng ka la pynbna ïa ka rai ba kan leit ban pynlong biang ïa ka jingïashong kyllaiñ myngor ha Nongbah Delhi ban pynbor ïa ka sorkar pdeng ba kan pyntreikam noh mardor ïa ka Inner Line Permit (ILP) bad ka jingkynthup ïa ka ktien Khasi bad Garo hapoh ka khyrnit kaba 8 jong ka riti synshar jong ka ri India.
Haba kren sha ki lad pathai khubor u President ka HANM u Bah Lamphrang Kharbani u la ong ba ki pulit ka Delhi ki la dep ban ai ka jingbit ïa ka seng ban pynlong ïa kane ka jingïakhih da kaba shong kyllaiñ myngor ha Jantar Mantar ha ka 25 tarik u bnai Rymphang, jong u snem ban wan.
U la ïathuh ba ha ka por ba ki la leit jngoh ïa ka Delhi, ki nongmihkhmat jong ka HANM ki la dep ruh ban ïakynduh ïa u MP ka Rajya Sabha u Rakhesh Sinha, uba dei ruh u nongïalam ka BJP uba khmih ïa kane ka thaiñ shatei lammihngi bad ki la aiti ruh ha u ïa ka copy ka jingkyrpad ba la phah ruh sha ka President jong ka ri India, nangta u Myntri Rangbah duh ka ri, nangta sha u Myntri Khynnah uba khmih ïa ka tnat ki Kam Pohïing haba ïadei bad ka jingdawa ban pyntreikam noh mardor ïa ka ILP ha Meghalaya bad kumjuh ruh ka jingkynthup ïa ka ktien Khasi bad Garo hapoh ka khyrnit kaba 8 jong ka riti synshar ka ri India.
U la bynrap da kaba ïathuh ba na ka liang u MP u la pynthikna ïa ki dkhot ka seng ban ïasyllok ïa kine ki jingdawa hapoh ka committee jong ka sorkar pdeng. “U MP u la kular ban wan sha Meghalaya ban ïasyllok bniah ïa kine ki mat,” u la ong.