Yn leit jurip baroh ar ki Myntri Rangbah ïa ki jaka khappud shwa ban ïakren pynbeit pud

0

Shillong, Jymmang 16 : U Myntri Rangbah ka Jylla Conrad K Sangma mynta ka sngi Ba-ar ula pyntip ba ka Sorkar Meghalaya bad Assam kin sa shong ïakren pynbeit pud jong ka wat kaba ar ha kine ki artaiew ban wan.
U Conrad ula ong ba ka Sorkar Meghalaya ka la ïakren man ka por bad ka Sorkar Assam halor ka jingjia kaba jia hapoh ka shnong Khanduli. Ula pyntip ba ka jingïalang bad ka Sorkar Assam kan sa long khlem pep shuwa ban kut une u bnai Jymmang.
“Ngi la ïarai lang ban don ka jingïajurip lang ha ki jaka kiba jur ka jingïakynad ban wanrah ïa ka jingshngaiñ bad jingshaniah jong ki paidbah bad ruh ban kyntu ïa ki bor District, ki nongshong shnong bad ki Ophisar ba khmih ïa ki thaiñ ba kin kiar na kino kino ki kam kiba lah ban wanrah ïa ka jingïakynad” ong u Conrad.
Lah ban kdew ba ha ka 11 tarik Jymmang, ki paid Karbi bad ki Khasi-Pnar ki la poi sha ka jingïaktah kti bad ïa kawang maw ha Khanduli bad artylli ki sem ki la shah wiang ding.
Kane ka jingïakynad kala jia hadien ba ka Dorbar Shnong Khanduli ka la pyrrkhing ïa ki Karbi ba kin ïaid lyngba ka Shnong. Kane ka la jia ruh hadien ba ka kynhun ki Karbi ki la byrngem ïa ki Khasi-Pnar kiba leit sha ki jaka rep.
Ha kane ka jingjia, ka kali u Superintendent of Police ka West Jaintia Hills ka la shah lun maw ha ki paidbhur. U SP ula lait phet da ka said hynrei ka kali jong u kala julor ha kane ka jingjia.

Leave A Reply

Your email address will not be published.