Ngi la ïai pynbor ïa ki BSF ban aiti sha ngi ïa kito kiba donkti ban siat ïa u Bah Roning: DGP

Shillong, Jymmang 16: U Director General of Police (DGP) ka jylla u Dr LR Bishnoi ha ka sngi Ba-ar u la ïathuh ba na ka liang ki pulit ka jylla ki la ïai pynbor ïa ki Border Security Force (BSF) ba kin aiti ïa ki laingut ki BSF kiba la shah kem namar ka jingdonkti ban siat ïap ïa u Bah Roningstar Nongkynrih ha Mawshun.
Haba kren sha ki lad pathai khubor hadien ba la wai ka jingïalang kaba u Symbud Myntri Rangbah u Bah Prestone Tynsong ka jylla u la khot ïa ki pulit bad ki BSF, u DGP u la ong, “ngi la ïai pynbor ïa ki BSF ba dei ban aiti sha ki pulit kat kum ka hukum ka iing kashari”.
U DGP u la ong ruh ba na ka liang u Symbud Myntri Rangbah un ïakren bad ki bor kiba kham shalor ‘namar ki BSF ki dei ki nongtrei ka sorkar pdeng bad ki don ki kyndon kiba ngin hap ban bud,’ u la ong.
Shuh shuh u la ïathuh ba na ka liang ki heh ka BSF ha ka jingïakren ki la kular ban shim ki lynti jingpynshitom pyrshah ïa kine ki shipai BSF kat kum ki kyndon aiñ jong ki.
Lah ban kdew ba ki BSF ki la siat ïap ïa u Bah Roningstar Nongkynrih ha ka shnong Mawshun ha ka meit jong ka 5 tarik Jymmang ha ka kali kaba u ñiah bad tang hadien khyndiat sngi na ka liang u Inspector General Pradip Kumar ka BSF Meghalaya Frontier u la thaw ïa ka Court of Enquiry ba la khlieh da u Ophisar ha ka kyrdan DIG bad ha kaba tang khyndiat sngi hi na ka liang ki BSF ki la kem ïa laingut ki dkhot jong ka kiba donkti ha kane ka kam ïa uba la tip kyrteng kum u Moni Singh uba dei u Head Constable, u Sengel Singh bad Kdam Kishore.
Kat kum ka jingtip ba la ïohlum la ïathuh ba une u head constable u la siat haduh lai kuli na ka suloi Beretta SMG ïa u bah Roningstar.