Plie u CM ïa ka jingrakhe dap 100 snem ka skul Presbyterian Higher Secondary School

Shillong Jymmang 16 : U Myntri Rangbah ka jylla u Conrad K Sangma mynta ka Sngi Ba ar, ula plie pyrda ïa ka jingrakhe dap 100 snem jong ka Jaiaw Presbyterian Higher Secondary School kaba don ha Jaiaw Pdeng.
Ha ba kren ha ka jingïalang u Myntri Rangbah ula ai jingïaroh ïa ka skul, ki dkhot jong ka Managing Committee bad ki nonghikai kiba la don ïa ka bynta kaba khraw ha ka ban btin lynti ïa kane ka jaka pule ha baroh kine ki snem naduh ka por ba dang sdang ïa kane ka skul kaba la noh synniang shi katdei ha ka ban kyntiew ïa ka pule puthi jong ki khynnah khamtam ïa kito kiba wan na ki longïing kiba duk.
“Nga hap ban shim ïa kane ka kabu ban ai khublei ïa baroh kiba la trei shitom bad kiba don jingïadei bad ka skul ha ki bynta bapher bad ban pynlong ïa ka kumba ka long mynta bad nga ngeit skhem haba phai sha phi baroh phin don ïa ka jingsngew hun ban ïohi kumno ka kala ïaid shaphrang ha ki snem kiba la leit” ong u Myntri Rangbah.
Ula ong kane kadei ka sngi kaba kyrpang ban kynmaw ia baroh ka jingjop jong ka skul ha ki phew snem kiba la leit bad kadei na ka bynta ka bha ka miat jong baroh, ba ka skul kadei ban don iaka jingthmu ban iaid shakhmat bad ban don iaka thong bad ka jingangnud kaba lah ban wanrah iaka jingkylla kaba bha ha ka pule puthi jong ki khynnah skul.
“Phi dei ban don ïa ka thong namar ba kan kdew ïa ka lynti ban trei bad ban ïaid shakhmat ryngkat bad ka jingdon ïa ka jingïohi jngai ban pynurlong ïaka thong. Nga kyntu ïa ka Managing Committee bad ïa baroh ki dkhot jong ka Balang bad kumjuh ïa kiba la pyndep ïa ka jingpule na kane ka skul bad kiwei kiba ïadon bynta bad ka skul ba kin buh ïaka thong bad ban ïaid shakhmat ban pynurlong bad ban kynjoh ïa ki mawmer kiba kham shajrong na ka bynta ka skul ha ki snem ban dang wan” ong u Conrad.
Nalor kane ula kren ruh ha kaba ïadei bad ka jingeh kaba ïakynduh da ka tnad pule puthi haka jylla.
“Lada ngi leh ïa kano kano ha kaba iadei bad ka pule puthi, ngi dei ban buh ha dohnud ïa ki khynnah pule, haba ngi shim ïa ka rai kum ki nonghikai, nongïalam saiñ pyrthei ne kum ka sorkar. Kaei kaba mih na ka rai kaba ngi shim kadei ban long na ka bynta ki khynnah pule” ong u Conrad.
U Myntri Rangbah ula ïathuh ruh ba ha Meghalaya ki don la jan kumba 14000 tylli ki skul bad palat 55,000 ngut ki nonghikai kaba long bun bha, haba ïanujor bad kiwei pat ki jylla kiba rit ha ka thaiñ shatei lam mihngi.
Ula ong ba ka jylla ka pynlut T.2200 Klur man la ka snem ha ka ban ai ïa ki Grant bapher sha ki skul bapher bapher bad wat hapdeng ka jingbhah tyngka kaba bun bha bad la phaikhmat bha sha ka pule puthi, ka jylla ka dang donkam ban trei shitom ban long kum ka jylla kaba wan shakhmat bha ha ka liang ka pule puthi ha ka ri.
U Myntri Rangbah ula pyntip ruh ba shen ka sorkar jylla kan sa thaw noh ïa ka Education Commission ka ban khmih ha baroh ki liang ha kaban pynbha ïa ka pule puthi ha ka jylla.
Ha katei ka jingrakhe u Myntri Rangbah ka jylla ula pynbna ban ai ïa ka Grant kaba T.20 Lak na ka Chief Minister’s Special Development Fund na ka bynta ban tei ïa ka building jong ka skul.
Ha kane ka jingïalang la ïadonlang u Chairman ka Meghalaya State Planning Board u Bah Metbah Lyngdoh, u Moderator jong ka KJP Assembly u Rev WP Marbaniang, ki dkhot ka Managing Committee, ki nonghikai, ki khynnah skul bad kiwei kiwei.