Lada ki bud ïa ka jingïapynbeit ha u 2014 kam dei ka jingkhñiot beiñ ïa ki nongrep: Ardent

Shhillong, Jymmang 16: Shisngi hadien ba ka Executive Committee jong ka Khasi Hills Autonomous District Council ba la ïalam da u Bah Titos Chyne ka la kynnoh ba ka jingot kilo ha Ïewduh ka sdang naduh u 2014 ha kaba ka EC kaba u la pynmih syndon da ka hukum, na ka liang u Bah Ardent ha ka sngi Ba-ar ka la takraiñ kylla ïa kane ka jingkynnoh da kaba ong ba ka dei tang ka jingkwah ïalam bakla ka EC ba mynta.
“Lada kito ki dkhot ka EC kiba khyllie ïa ka file jong u snem 2014 kin bud kumba la pruid dak kam dei satia ka jingkhñiot beiñ ïa ki nongrep namar ha ka jingïalang kaba nga la lum kum u CEM ha kato ka por ki nongrep bad ki nongkhaïi ki la rai ba ïa ki mar rep ba wanrah ha Ïewduh ba ka jingot kilo ïa ki mar ba don hapoh 50 Kilo kam dei ban palat ïa ka 2 kilo bad ïa kiba 51 kilo shajrong ka jingot kilo kam dei ban palat ïa ka 3 kilo shiteng bad ha ka jingïapynbeit hapdeng ki nongrep bad ki nongkhaïi ïa kane ka mat kam dei satia ka jingot kilo khñiot beiñ hynrei kaba la don ka jingïasngewthuh na arliang mamla,” u la ong.
“Ban kynnoh ba ka jingot kilo ka sdang ynda nga long CEM ma nga ka dei lehse ka jingkren bitar i nongkren bad nga kwah ban ong ruh ban leh ïa kino kino ki kam tang ban myntoi saiñ pyrthei ka long kaba bakla shibun,” u la bynrap.
U Bah Ardent u la ong ruh ba na jingkam ka EC ba kam don shuh ka jingot kilo naduh u 2019 ka long kaba bakla namar lada kam don shuh ‘balei ban mih ka jingud bad balei ba ki Executive Member ki leit jurip,’ u la ong.
U la ong ruh ba jin lada ka jingïapynbeit kaba ka EC ba u ïalam ha u 2014 la bud beit ka jingud na ki nongrep kan ym mih shuh namar ban poi sha katei ka rai ka dei ka jingmynjur lang na baroh ki liang.
“Kane ka jingkynnoh ka dei na ka daw ba ki la itieng ïa ngi namar u paidbah u ai jingkyrshan ïa ngi bad na ka liang jong ki ki pyrshang ban wad daw ban ïalam bakla ïa u paidbah,” u la ong.
Lah ban kdew ba na ka liang ka Executive Member jong ka tnat Market jong ka KHADC ka Kong Grace M Kharpuri ha ka sngi Nyngkong ka la ong ba ka jingkam u Bah Ardent ba ka jingot kilo kam don shuh haba u ïalam ïa ka KHADC ba ka dei kaba bakla namar dei ma y uba da pynmih da ka hukum na ka KHADC.
“Ha u nongrep lada ong ot kilo ka mut ka jingot beiñ ïa ki mar rep khlem ïahap shuh bad ka jingkhia ki mar rep ym, kam mut lada ot shi kilo ne shiteng na ka shi kriah ne shi bynri da ka jingsngewthuh jingmut u nongrep bad nongkhaïi ka dei ka jingot kilo khñiot beiñ ïa u nongrep kumba pyrkhat kane ka EC,” u la ong.