Khliehriat, Jymmang 16: Ki hynriew tylli ki Dorbar Shnong kiba na elaka Narpuh, East Jaiñtia Hills District, ba kynthup ka Dorbar Shnong Umkiang, Dorbar shnong Kuliang, Dona Skur, Dona Umbluh, Lumphyllut bad Dorbar shnong Pyrtakuna, mynta ka sngi ki la phah da ka jingthoh sha u Deputy Commissioner ka East Jaiñtia Hills District ba dawa ba dei ban weng noh mardor ïa ki shipai ïada khappud, ki BSF kiba ju ieng ap pahara ha ka surok National Highway-6 ha Sonapur bad ha Ratacherra, East Jaiñtia Hills District, ïa kane ka shithi ki Dorbar shnong ki la phah ruh sha u Symbud myntri rangbah ka jylla (Deputy CM), sha ka MLA ka thaiñ, ka kong Santa Mary Shylla bad sha u Superintendent of Police East Jaiñtia Hills District.
Lyngba ka jingthoh, kitei ki Waheh Shnong ki la byrngem ruh ba lada ym weng noh kloi ïa kitei ki shipai BSF kan mih ka jingiakhih paidbah hapdeng ki riew paidbah bad ki shipai.
Katkum ka shithi, ba la soi kyrteng da u Waheh Shnong Umkiang, u bah Lasting Pala, u Waheh shnong Donaskur, u bah Jennysai Pohkyrnu, Waheh shnong Dona Umbluh, u bah W.Tariang, Waheh shnong , Lumphyllut, u bah Fantin Pajat, Waheh Shnong, Pyrtakuna, u bah L.Bareh, Waheh Shnong Kuliang, u bah M.Lamare, ki la pynpaw ïa ka jingbym sngewtynnad jong ki ban don ki ktem pahara jong ki shipai ha surok national highway ha East Jaiñtia Hills District, namar kine ki shipai ki ju wanrah jingeh man ka por ïa ki paidbah nongleit nongwan kiba ïaid lynti bad ong ruh ba ka ju buh jingsyier ruh ïa ki paidbah namar kitei ki shipai ki ju pynlong ïa ka jingtalasi ba khah khah bad kane ka long pynban kum ka jingpynsaja ïa ki paidbah nongleit nongwan kiba lui lui ki bym don kano kano ka jingmut ba sniew hapoh, kane ka jingleh kaba ju long kum ka jingpynsaja ïa ki nongliet nongwan ka ju jia bha ha ka BSF Check Post kaba don ha Sonapur bad kaba kham ima shuh shuh ka dei ka jingpynap shrip da ki nar kiba nep kum ki kynja prek hapdeng surok ba ïaid ki kali, kaba la i pynban kum ka jaka ïaleh thma ne ka jaka ba don jingiakajia.
Kawei ruh ka mat ba la pynpaw, la ong ba ki shipai BSF ki ju leit ha man la ki iïng ha Umkiang bad ki ju shon dur ruh ïa ki jaka buh tiar (godown) jong ki nongshong shnong bad kane ka jingleh jong ki shipai ka ju pynlyngngoh bha ïa ki paidbah nongshnong shnong kiba lui lui ki bym ju don kano kano ka jingmut ba sniew hapoh jong ki.
La ong ruh ba bunsien, ki bor shnong ki ju ioh ïa ki jingujor na ki paidbah kiba ju ujor shapang ki jingleh don bor ki shipai BSF kiba don ha Ratacherra bad ha Sonapur.
Kitei ki Waheh Shnong ki la pynpaw bad ong “Ngin ym pdiang da lei lei ruh ïa kine ki shipai ban don ha surok national highway, wat ka National Highway Authority of India ruh man ka por ka la pynpaw bad wad ki lad ki lynti ban weng noh ïa ki shipai kiba ieng pahara ha Sonapur namar ka wanrah ïa ka jingjulor ka surok bad ka jingkieng, namar katba ki shipai ki dang pynlong ïa ka jingkhynra bad talasi ïa ki kali, kiba bun bah pat ki kali ki dang ieng laiñ halor jingkieng bad kane ka wanrah ïa ka jingjulor ka surok bad ka jingkieng”
“Wat ka bor synshar District ruh ha ki por ba la dep ka la pyllait ïa ka hukum ban weng noh ïa kitei ki shipai kiba ieng pahara, hynrei haduh mynta ym pat shym la lah ban leh ïa kane”
La ong ruh ba kitei ki shipai BSF la i kumba ki la shna pynskhem ïa ka ktem ha ka jaka ba kin ïaid pahara (patrolling) bad ki da pynwit ruh ïa ka surok bah ba ïaid ki kali, kumta khnang ban lait na kano kano ka jingïakajia bad jingia heh nia hapdeng ki riew paidbah bad kitei ki shipai, ki Waheh Shnong ki dawa na ki bor District jong ka East Jaiñtia Hills District ba dei ban weng noh mardor ïa kitei ki shipai na Ratacherra bad na Sonapur.
Haba kren sha ki pathai khubor, kitei ki Waheh Shnong, ki la pynpaw ruh ba ha ka jingshisha ïa kitei ki shipai BSF la dei ban phah ïa ki sha ki jaka khlaw ba khappud bad ka ri Bangladesh, namar man la ka por ki nong Bangladesh ki ju wan rung tuh sha ri India na ki jaka khlaw kiba don ha East Jaiñtia Hills District, hynrei ka sorkar ka la phah wan ieng ap pahara pynban ha surok bah national highway bad kane ka long kaei kaei kaba kitei ki Waheh Shnong kim pdiang satia hynrei dei ban phah ïa ki sha ki jaka khlaw ba khappud, ki la pynkynmaw ruh ba dang myn ha kine ki khyndiat bnai, ki dkhot jong ka KSU Narpuh ki la pynpaw ka jingsngew bitar halor ka jingiohlad ban wanrung tuh ki dkhar Bangladesh kiba wan lyngba kawei ka khlaw kaba don ha Kuliang bad ki da jam sha shiliang ïa ka wan Apha, ki la ong ba balei ki shipai BSF kim lah ban kem kum ïa kine ki briew kiba wan da ki kynhun kiba wan rung tuh sha ri India, ki dawa ba dei ban phah noh ïa ki tei ki shipai kiba ju ieng ap pahara ha Sonapur bad ha Ratacherra ba ki dei ban leit sha ki jaka khlaw ban peitngor ïa ka jingrung tuh ki nong Bangladesh.
Ha kajuh ka por, ki Waheh Shnong, ki kyntu ïa ki bor synshar district ban snhim khia ïa kane ka kam bad ban shim khia ruh ïa kane ka jingdawa jong ki ba ki la buh hakhmat u Deputy Commissioner.
