Ym pat siew ka sorkar ïa ka bai kali naduh por COVID bad election MLA: Trai Kali

0

Nongpoh, Jymmang 16: Ki nongïalam ka Joint Action Committee ryngkat ki Draibar bad ki trai Kali mynta ka sngi ki la leit syndon ban kynduh ïa u Deputy Commissioner ka Ri Bhoi, u Arpit Upadhaya ban aiti ïa ka dorkhas kaba ki la kyrpad ban pynlait noh ïa ka pisa ba dang pynsahteng da ka sorkar halor ka jingpyndonkam ka sorkar ïa ki Kali jong ki na ka bynta ka khlam COVID-19 bad kumjuh ruh ha kane ka election jied nongmihkhmat ba dang shu dep shen ha ka jylla.
Kum ban pynpaw, ki trai Kali bad ki dribar mynta ka sngi ki la leit ban ai syndon da ka dorkhas sha u Deputy Commissioner ka Ri Bhoi, ka dei hadien ba ka sorkar ka la shim wai ïa ki kali jongki na ka bynta ban pyndon kam ha ki snem ba la dep noh ba dang wan lynshop ka khlam COVID-19 bad kumjuh ruh ha kane ka election jied nongmihkhmat ba dang shu dep shen hapoh ka jylla.
Ki la leit ruh ban ïa kynduh ïa u Deputy Commissioner ka Ri Bhoi, ka dei ha ka lama jong ka Joint Action Committee ba la synrop lang da baroh ki Kali kamai paidbah ba la tip kum ka All Ri Bhoi Passengers Vehicles (ARBPV) ba ka sorkar haduh kine ki sngi ka dang pynsah ïa ka pisa khlem da siew dep. Kine ki Kali ba la ïa synrop lang ki kynthup naduh ki Kali Local Taxi, ki Sumo, ki Bus bad Kali pickup.
Ha ka ka jingïalam u Chairman, u Bah Bines Makri bad u General Secretary, u Bah Vincent Sohkhwai kum u General Secretary ki la shim ruh ïa ka rai ban ai da ka dorkhas sha u Deputy Commissioner ka Ri Bhoi, ka dei ruh hadien ba ki la dep ban ïa shong pyrkhat ha ka 16 tarik u Jymmang 2023 ba ki la shim rai ba lada ka sorkar kam lah ban siew dep ïa ka pisa ba ki la shim wai ïa ki Kali, na ka liang ki trai kali bad ki dribar kin nym treh shuh ban dang ïa trei lang bad ka sorkar lada ka dang donkam nangne shakhmat.
Kumba la pynpaw da kitei ki nongïalam, la ong ba tang ha kane ka election jied nongmihkhmat ha ka jylla, ki bor synshar district ka Ri Bhoi ki la shim wai haduh kumba 400 tylli ki Kali kamai paidbah, hynrei haduh mynta wat la ka election jied nongmihkhmat ka la dep bad kum ki dribar bad ki trai kali kim shym la ioh pdiang ïa ka pisa na ka sorkar.
Haba kynduh bad aiti ïa ka dorkhas sha u Deputy Commissioner ka Ri Bhoi, ki nongïalam ka JAC ki la pynsngew ïa ki jingeh ba ki ïa kynduh kum ki trai kali bad ki dribar na ka daw ka jingpynslem ka sorkar ban pynlait ïa ka bainong ba ki la trei la ka long naduh ka por jong ka khlam COVID-19 bad kumjuh ruh wat ha kane ka election ba dang shu dep shen ha ka jylla.
Namarkata, na ka liang ki nongïalam ki la kyrpad jur ïa u Deputy Commissioner ka Ri Bhoi ba un shim khia ïa kane ka bynta ban ïa kren sha ka sorkar na ka bynta ban pynlait noh mardor ïa ka pisa ba ki dei ban ioh bainong bad kum ki nongïalam ki la pynpaw ruh ka jingkmen ba u deputy commissioner ka Ri Bhoi u la kular ban shim khia ïa kane ka kam khnang ban weng noh ïa ki jingeh jong kine ki Trai Kali bad ki Dribar.

Leave A Reply

Your email address will not be published.