Kat bym pat ïoh tulop, yn bteng ki nongtrei ka MeECL ban sangeh ka jingtreikam

0

Shillong, Jymmang, 16: Ki nongtrei jong ka MeECL kiba don hapoh ka lama jong ka Coordination Committee of Registered MeECL Employees Associations and Unions (CCORMAU) ha ka sngi Ba-ar, ki la byrngem ban sangeh ka jingtreikam bad ban bteng ïa ki jingïakhih ha ki kynta long trei katba ki bor pynïaid jong ka MeECL kim pat siew dep ïa ka tulop.
Kane ka jingïakhih jong ki nongtrei ka MeECL ka long hadien ba kim shym la ïoh satia ïa ka tulop jong u bnai Ïaiong wat hadien ba la poi haduh ka 10 tarik u Jymmang, 2023.
Da ki spah ngut ki nongtrei ka MeECL ki la mih sha phyllaw jong ka ophis treikam ka MeECL, kaba don ha Lum Jingshai, Shillong da kaba rah ïa ki plakad ban dawa na ki bor pynïaid ban pyllait noh ïa ka tulop jong u bnai Ïaiong 2023.
Ha ka jingïakren bad ki lad pathai khubor u Vice President ka CCORMAU u Bah Arju Dkhar u la ong ba kane ka jingshah set tulop jong ki nongtrei ka MeECL kam dei shuh ka sien kaba nyngkong bad dei na kane ka daw ba la pynlong ïa ki nongtrei ban pynlong da ka jingïakhih kum ka jingpyrshah ïa ka jingleh jong ki bor pynïaid ka MeECL.
U la kynnoh ba ka jingpynslem jong ka MeECL ban pyllait ïa ka tulop jong ki nongtrei ka long kaba be-aiñ.
U la ong ruh ba ka MeECL ka dei ban siew ïa ka tulop jong ki nongtrei hapoh ka 10 tarik manla u bnai katkum ka kyndon 17 jong ka Wage Act bad nalor kata u la ïathuh ruh ba ka ka Union ka ladep phah da ki jingthoh na ka por sha ka por sha ki bor pynïaid hynrei watla katta ka jingpynslem ban siew ïa ka tulop ka dang ïai bteng beit na kawei ka por sha kawei pat.
“Ka jingïoh nong jong ka MeECL ka long ym duna ïa ka T. 80 haduh T. 110 klur hynrei ka long kaba sngewsih ban ïohi ba ki bor pynïaid ïa ka MeECL kim lah ban pyllait ïa ka tulop jong ki nongtrei. Dei halor kane ka daw ba ka Union ka la rai ban mih madan ban ïakhih naduh ka 11 tarik jong manla u bnai tad haduh ba ki bor pynïaid kin da pyllait ïa ka tulop ha ka por kaba dei,” la ong u Bah Arju.
U la ong ba ki nongtrei ki sngewthuh ba ka MeECL ka don hapdeng ka jingkit ram ba ka hap siew khamtam ïa ka NEEPCO hynrei ki bor pynïaid ki dei ruh ban sngewthuh ba ki nongtrei ki donkam ban ïoh tulop na ka bynta ban pynïaid ïa ka iing ka sem.

Leave A Reply

Your email address will not be published.