Shillong, Jymmang 16 : U Myntri Rangbah ka Jylla Conrad K Sangma mynta ka sngi Ba-ar, ula pyntip ba kam pat shym don satia kano kano ka rai ban ai shuki Myntri Sorkar ïa uwei na ki arngut ki MLA ka PDF kiba la wan bynraplang bad ka NPP dang shen.
“Kam pat don satia ka rai halor kane. Kine baroh ki dang dei tang ki jingantad” ong u Conrad haba ïakren bad ki nongthoh khubor haba jubab ïa ka jingkylli la ka UDP kan duh noh ïa kawei ka shuki Myntri ban ai jaka ïa u MLA ka PDF ban shimti ïa ka shuki Myntri.
U Conrad uba dei u National President ka NPP ula ong ba ka result jong ka Elekshon ha Sohiong kan nym don jingktah eiei ïa ka jingiadei hapdeng ka NPP bad ka UDP.
“Em, lada ka dei ban don ka jingktah ha ka jingïadei, kan jin da la ktah naduh ka elekshon MLA 2023. Wat ha ka elekshon2023, kila don shibun ki kyntien ba la pyndonkam ban kynthoh hynrei ngi dang ïai bteng ban neh kum ki paralok ha ka Sorkar MDA” ula ong.
“Ngi la kren ruh ha ka por elekshon wat ha ka elekshon MLA 2023 ruh ba lada phi phai dien sha ka elekshon, ngin la ïawan lang hajuh bad ngi la ban jur halor ka jingshisha ba ngi la ïatreilang ha kine ki san snem ba la leit ban pynïaid shakhmat ïa ka Jylla bad ha kane ka juh ka nongrim ngi kwah ban pynbteng” ong u Conrad.
