Mawkatad, Jymmang 16: Ha ka khubor kaba sngewtynnad bad kaba ai mynsiem ïa kiba bun, ki Nongïalam jong ka Balang Presbyterian Mawkatad, Nongum Presbytery, ki la shim wia ban puh ktieh ne puh lyngkha na ka bynta ban pynmih pisa ha kaba tei ïa ka ïingmane ba thymmai jong ka Balang.
Ka Balang Mawkatad ka don ha ka Shnong Mawkatad ha ka surok ba ïaid na Myriaw sha Mawsynnam, Eastern West Khasi Hills District.
Ha ka Saitjaiñ,ki Tymmen Basan, kynthup ruh ïa u Tymmen Basan rangbah, u Bah Ngesstar Marngar, uba la palat 70 snem ka rta, nangta ki Rangbah Balang bad ki Samla, ki la ïa mih ban leit puh ïa kawei ka lyngkha kba, kaba don harud jong ka Wah Tyrsung kaba don hapdeng ka Shnong Mawkatad bad Nongum.
Kane kadei kaba la pynbeit da ka Balang ban leit shim wai ban puh ïa kane ka lyngkha na ka bynta ban pynmih pisa ban tei ïa ka ïingmane ba kaba thymmai, kaba mynta ka la ïaid ka jingtrei bad ka la dep la kumba mar shiteng.
“Kane kadei kawei na ki lad pynmih pisa jong ka Balang ban tei ïingmane kaba thymmai bad ngi ju leh kumne ruh man la ka snem”, la ong u T.Bn Ngesstar haba ïakren bad u nongthoh khubor ha katei ka lyngkha.
U la ïathuh ruh ba ha kane ka sngi ba puh lyngkha la mih haduh 30 ngut ki rang puh lyngkha ha ka jingshimwai kaba 8 hajar tyngka.
Ka daw ba la shna noh da ka ïingmane kaba thymmai kadei namar ba ka ïingmane kaba tim ka la khapngiah bad kam ngiam shuh ïa ki riewngeit ka Balang kiba mynta ki la don kumba 300 ngut eiei.
Ki Tymmen Basan ki la ïathuh ba la shu antad ba ka jinglut baroh ynda ladep kane ka ïingmane kan poi sha ka 1 klur eiei.
Mynta la tei ïingmane thymmai ha jaka kaba kham kylluid bad kaba long madan bad kiba bun ki bynta ladep ban shna,naduh ki paia, ka tnum, ki jingkhang ïit bad kiwei kiwei de ki bynta.
Nalor ka jingshim wai puh lyngkha,ka Balang ka ju pynlong ruh ïa ki jingïaseng lum jingainguh da kaba khot ïa ki parabangeit napoh ka Presbytery ban lum jingainguh kyrpang na ka bynta kane ka ïingmane thymmai.
