Ka dei tang ka jingphohsniew ramïa ka sorkar ban kynjoh sha ka 10 hajar billion dollar economy: VPP

Shillong, Jymmang 16: Ka Voice of the People Party (VPP) ka la kynnoh ba ka jingkam u Myntri Rangbah ka jylla u Conrad K Sangma ha ka dorbar mang tyngka kaba la dep ba ka sorkar ka buh thong ban pynlong ïa ka jylla kaba ka ïoh ka kot kaba poi 10 billion dolar ka dei tang ka jingphohsniew kynsha.
Ha ka kyrwoh sha ki lad pathai khubor u Nongaiktien ka VPP u Dr Batskhem Myrboh u la ong, “Ka seng ka pynpaw ïa ka jingsngewkhia ba ïa ka jylla la ïalam da u briew u bym don jingsngewthuh ïa ka jinglong jingman jong ka jylla bad u bym don ka thong kaba shai na ka bynta ka lawei jong ka jylla.”
“Ha ka Dorbar Mang tyngka kaba la dep, u Myntri Rangbah u la pynpaw ba u don jingthmu ban kyntiew ïa ka ïoh ka kot jong ka jylla sha ka 10 hajar billion dollar. Ka long kaba sngewthamula kumno yn lah ban kyntiew ïa ka ïoh ka kot ha kaba tang ka bor ding ilektrik ruh kam long kaba biang. Kumba long mynta ngi duh bording haduh 10 kynta ha ka shi sngi ha Meghalaya. Wat u briew uba biet tasngeng tam ruh un ym lah ban pdiang ïa kane ka phohsniew ramïa jong ka sorkar. Kane ka jingpynduh bording ka la ktah ha baroh ki liang naduh ka kamai ka kajih jong ki ba bun bad ka la ktah ruh shi katdei eh ïa ki samla pule khamtam eh ha kum kane ka por ïaleh eksamin”, u la bynrap.
U Dr Batskhem u la pynpaw ruh ïa ka jingbynñiaw ïa ka rukom treikam jong ka sorkar MDA 2.0 ha kaba ïadei bad ka jingtih ïa ki marpoh khyndew ha ka jylla.
“Ka mang treikam thymmai jong kane ka sorkar ka pyni shai kdar ba ka kwah ban pynroi spah ïa ki katto katne kiba ïajan bad ka sorkar. Kane kan pynriewspah ïa kiba la riewspah bad pynduk shuh shuh ïa kiba duk. Kumba la ïohi ïa ki kam beaiñ jong ka sorkar MDA kaba wat ka High Court badonburom ruh ka la pynpaw na ka por sha ka por, ka don jingantad ba ka jingtih marpoh khyndew be-aiñ ka lah ban sdang biang ha ka jylla ha ka kyrteng jong ka ka rukom tih katkum ka jingstad saïan. Ka VPP kam ïahap bad kane ka jingleh jong ka sorkar MDA bad ka ngeit ba ka jylla ka lah ban roi tang lada ka sorkar ka lah ban wanrah ïa ka rukom treikam ka bym shah liang khamtam eh da ka pyrkhat na ka bynta u duk u suk,” ong ka kyrwoh.