Yn lam khmat u MLA Mawkynrew ïa ki nongrep ban ïakren bad u CM

Shillong, Nailar 02 : Ka jingïoh pdiang ïa ka jingud jingnam na ki nongrep synsar ka thaiñ Mawkynrew ba ka jinghiar ka dor ka la long shaba palat kata na ka 130 tyngka ha ki snem ba la dep sha ka 30 tyngka mynta shi kilo nalor ka jingshah ot kilo ha ki mahajon ha Mawiong ka la pynlong ïa u MLA ka Mawkynrew Constituency, u Bah Banteidor uba dei ruh u Myntri Sorkar barim ba peit ia ka tnad kam rep ban lum ïa ki nongrep bad ki nongïalam shnong na katei ka thaiñ ban ïathir halor kane ka kam ha ka 01 tarik u Nailar, 2024 ha Thangsning.
Da ki spah ngut ki nongrep ki la tuid sha kane ka jingïalang ha ryngkat ki nongïalam shnong ha kaba ki la pynsngew ïa ki jingsohsat kiba ki ïakynduh na ka jinghiar dor palat u synsar. Ki nongrep kiba shaniah ha ka kam thung synsar ki la ong ba ka jinghiar ka dor ka la ktah ïa ka ïoh ka kot jong ki haduh ba ki la shem jingeh ban pynleit skul ïa la ki khun ki kti jong ki bad pynpaw ba ka dor die kam ïahap kam ïa poi shuh bad ka bai pynlut ha kaba trei ba ktah bad sumar ïa une mar rep khlaw.
Kumba bunsien hi ki nongrep ki pynpoi ïa u synsar ha ka ïew khaïi synsar ha Mawiong bad hangne pat nalor ba ka dor ka la rit lypa ki mahajon ki ot kilo ïa u synsar jong ki bad phiah kyrdan No 1, No 2 bad No 3 ïa une u mar rep khlaw ha la ka jong ka jong ka dor. Ki la ong ba haba kylli ïa kitei ki mahajon balei ba ka dor ka hiar palat, ka jubab kaba ki nongrep ki ïoh ka long ba ka jingdawa synsar na shabar jylla kam don bad kumta hap ban shu set kudam ïa u.
Hadien ka jingpynsngew na ki nongrep bad nongïalam shnong, u Bah Banteidor haba ai jingkren u la ong ba ïa u synsar la ithuh kum u mar-rep khlaw ha ka por ba ma u hi u bat ïa kam kum u Myntri ka tnad kam rep ha ka Sorkar ba la dep bad ha ka jingshisha ïa u synsar kam dei ban don shuh ka jingshim khajna kum jingot TP ne Forest Royalty da Khasi Hills Autonomous District Council (KHADC).
U la ong ba mar ïa ithuh ïa u synsar kum u mar-rep khlaw u la ïakren bad ki kharkaia ba haba ym ot khajna shuh dei ban ai ïa ka pisa sha ki nongrep. U la ong ba ka jingshim jingithuh ïa synsar kum u mar-rep khlaw ka la long ka jingmyntoi ïa ki nongrep bad ka dor ruh ka la kiew ha kitei ki por hynrei mynta pat kam long kaba lah ban pyrkhat ba kan hiar dor palat.
Da kaba pynpaw ba ka long kaba sngewsih ban ïoh sngew ba ka jinghiar dor u synsar ka la long haduh 3 shah, u la ong ba donkam ka jingkitkhlieh bad jingïatreilang bad un ïalam ïa ka kynhun ki nongrep bad nongïalam shnong ban leit ïakren bad u Myntri Rangbah, u Conrad K Sangma kumjuh ïa ka Myntri ba dei khmih ïa ka tnad kam rep ka Sorkar Jylla, ka Dr Mazel Ampareen Lyngdoh.
Nalor kane, u la ong ba hap pynbor ïa ka Sorkar ba ka dei ban khot ïa ki kharkaia ban kylli ïa ka daw ka jinghiar dor namar ban da dei tang khyndiat yn nym lah eiei namar ka kam ïew kam hat hynrei ynda la palat te ka lah ban don eiei sha lyndet ban khñiot beiñ ïa ki nongrep.