Shillong, Nailar 02: Katkum ka khubor ba la ïathuh da ki pulit la ong ba ki la ïoh jingtip ba ha ka 30 tarik u Naitung ha ka por kumba 9.30 baje mynmied, ka la don ka jingïamai ïania kaba la jia hapdeng uwei u G Isrel, nongñiah ka truck kaba don u nombar AP-39UL-0799 bad u nongbud jong u u ba kyrteng u G Saidi ha MUDA Parking Lot, Khlieh Ïewduh Shillong.
Ha kane ka jingjia kaba la mih syndon sha ka jingïashoh ïadat u G Isrel u la mynsaw jur bad la pynkit noh sha Civil Hospital Shillong katba u G Saidi u la shu mynsaw malu mala bad la phah sumar ïa ki baroh arngut.
Ha ka por ba pynlong ïa ka jingtohkit la lap ba utei u nongñiah ka trok uba la dih buiad bha u la pynthut bad u la shoh ïa la u jong u nongbud bad dei halor kane ba utei u nongbud ruh u la pynphai kylla.
Shuh shuh na ka liang ki pulit ki la ïathuh ba ha kawei pat ka jingjia uwei u nongshong shnong ka Nongbah Shillong bad uwei uba mihkhmat na ka Shriram Finance Ltd. Jyllishop, Nongthymmai, Shillong, baroh arngut ki la ujor lang ba uwei u ba kyrteng u Ratnam Bhattacharjee u la shim ram kumba T. 9,27,495/- napoh ka Shriram Finance Ltd., Jyllishop, Nongthymmai, Shillong bad u la thied ïa ka kali Maruti Baleno. Hynrei utei u Ratnam Bhattacharjee u khlem siew ïa ka EMIs, wat hapdeng kiba bun ki jingpynkynmaw bad ai notice.
