Yn kurup ka sorkar ïa ki jingdon jingem u Bah Iangrai ba u la pyndonkam bakla palat 3 klur tyngka

Shillong, Naiwieng 2 : Ka sorkar ka la kular ïa ka ïing bishar High Court jongka jylla ba kan kurup ïa baroh ki jingdon jingem jong u bah G.K Iangrai u pulit Ophisar uba la shah kem halor ka jingkynnoh bamsap ba la palat ïa ka 3 klur na ka jingthied kali ha ka tnad pulit bad kumjuh ruh na ka jingtrei ïa ka National Emergency Response System (NERS) PSAP ha Sadar PS Complex.
Ka ïing bishar ba la shong bishar da u Chief Justice Sanjib Banerjee bad u Nongbishar Justice W Diengdoh ki la pynmih ïa kane ka hukum.
Ka ïing bishar ka la ïoh pdiang ïa ka jingjubab hynrei ka long kaei kaei kaba sngewsih ba kine ki jia tad haduh ba ka ïing bishar ka hap ban tuklar shwa ba ka sorkar kan leh ïa kaba donkam.
Ha ka jubab da u Home Secretary la pynpaw ba ka sorkar ka la leh ïakaba donkam kat kum ki lynti ka aiñ. ïa kane ka jubab la wanrah da u AAG jongka sorkar bad la pynpaw ba wat u bah Iangrai ruh u dang pan por ban pynbiang ïa ki kot ki sla na ka kynhun tohkit.
Ki don haduh 43 ngut ki nongsakhi kiba la paw ha ka jingujor . Ka ïing bishar ka pynpaw ba ka kyrmen skhem ba ka jingtohkit kan sted ha kaba ïadei bad kane ka kam.
Namar ba ka sorkar ka la pynpaw ba ka shimkhia ïa ka kam kumta ïa ka jingshah ujor contempt of court pyrshah ïa u Home Secretary ruh la weng noh bad la map noh ïa u home secretary da ka ïing bishar.
Tangba ka ïing bishar ka la pynpaw ba ka ngeit skhem ba ïa kane ka kam yn shim khia da ki bor ba halor ban pynthikna ba kane ka pisa ba la pyndonkam bakla dei ban ïoh biang bad ïa une uba leh ruh dei ban pynngat ha ka kyndon aiñ. Ka ïing bishar kan sa shongbishar biang halor kane ka mukot duma ha ka 25 tarik Naiwieng 2022.